AMED (Nûpel) – Di jiyana rojane ya civakê de nan ne tenê xurekek e; ew sembola keda herî pîroz û berhema herî kevnar a mirovahiyê ye. Kamerayên Nupel TVyê vê carê berê xwe dan ser rêya Amed û Xarpêtê, li wir bûne mêvanê Fabrîkaya Nan a Tatê û jiyana kedkarên ku di navbera germiya agir û spîtiya ard de hildiberînin, bi kîtekît şopandin.
Berbanga Sibê û Coşa Kedê
Dema ku bajar hîn di xewa kûr de ye, li firûnê jiyan dest pê dike. Kedkarên firûnê beriya ku roj derkeve li ber firûnan amade ne. Ev xebata ku bi coşeke mezin tê meşandin, ne tenê ji bo nanê sade ye; li vir bi hostatî simîtên bi kuncî, çorekên Amedê yên bi bîhn, parxaç, nanê nav toraq ên taybet tên amade kirin.
Her hevîrê ku tê strandin, çîrokeke kedê di nav xwe de dihewîne. Kedkar bi lezeke mezin û bi hevahengiyekê dixebitin da ku nifûsa bajêr a qelebalîx bê nan nemîne.
ü
Sifreya Kedkaran: Tam û Piştevaniyê
Piştî saetên dirêj ên li ber germahiya 200-300 pileyî, firûnciyên ku westiyane, kêliyekê bêhna xwe didin. Ev kêlî dibe dema avakirina “sifreya kedê”. Kedkarên ku bi destên xwe nan û çorekên germ ji firûnê derxistine, li dora sifreyekê kom dibin. Di wê sifreyê de ne tenê xwarin, lê hevaltiya salan û parvekirina xebata giran heye.
“Heq û Hiqûq di Gramajê de ye”
Di nav vê herikîna xebatê de, xebatkarê bi navê Azad bi gotinên xwe yên baldar bala mirovan dikişîne ser aliyê manewî yê vî karî. Azad dibêje ku firotina nan ne tenê bazirganî ye, di heman demê de emanetek e:
“Karê me giran e, lê berpirsiyariya me hîn girantir e. Em di gramaja nan de hinekî zêde datînin ser. Em naxwazin heqê tu kesî bi me re bibe gorê û em naxwazin bikevin gunehê xelkê. Divê her nanê ku diçe malekê, bi heq û hiqûq were amadekirin.”
Encama Kedê
Nûçeya Nupel TVyê nîşan dide ku li pişt her nanekî ku em li ser sifrê dibînin, deryayek ji xwêdan û keda destan heye. Fabrîkaya Nan a Tatê bi kedkarên xwe yên wekî Azad re, nîşan dide ku li Amedê hîn jî pîvanên exlaqî yên pîşesaziyê û keda destan a bi coş zindî ne.
Ev kedkarên ku bi bîhna nanê germ bajar şiyar dikin, bi durustiya xwe jî dibin mînaka herî baş a “nanê helal”.
