NAVENDA NÛÇEYAN (Nûpel) – Li gundê Kizik ê Karamanê, otomobîla karkerên çandiniyê yên ku ji Rihayê çûbûn herêmê, qelibî şarampolê. Di encama qezayê de 3 zarokên malbatê jiyana xwe ji dest dan, 4 kes jî birîndar bûn.
Li navenda Karamanê, li gundê Kizik, otomobîla bi plaqeya 63 EA 265 a ku ajokarê wê M.İ. bû, dema ji ser pirekê derbas dibû, ji rê derket û kete nava deryê.
Daxwaza alîkariyê û encama qezayê
Piştî agahdarkirinê, tîmên tenduristiyê yên 112 Acil sewqî cihê bûyerê bûn. Bi hewldanên derdorê û tîmên rizgarkirinê, dayik û bavê zarokan û 2 kesên din ji nav otomobîlê hatin derxistin.
Lêbelê, di lêkolînên li ser otomobîlê de hat dîtin ku Mehmet Mustafa Îzol (4), Ramazan Îzol (12) û Mehmet Sinan Îzol (5) di nav otomobîlê de asê mane û jiyana xwe ji dest dane.
Rewşa birîndaran
Kesên birîndar piştî destwerdana ewil a li cihê bûyerê, bi ambûlansan rakirin Nexweşxaneya Lêkolîn û Perwerdeyê ya Karamanê. Tedawiya birîndaran li nexweşxaneyê dewam dike.
Cenaze sewqî morqê bûn
Cenazeyên zarokên ku jiyana xwe ji dest dane, piştî lêkolînên dozgerê komarê li cihê bûyerê, ji bo otopsiyê rakirin morqa heman nexweşxaneyê.
Hat hînbûn ku malbata Îzol ji bo karê çandiniyê ji Rihayê hatibûn Karamanê û dema qeza pêk hatiye, ew ji zeviyê ber bi çadirên xwe ve diçûn.
