RIHA (Nûpel) — Di çarçoveya lêpirsîna gendeliyê ya li ser Şaredariya Halfetiyê de, şaredarê berê Şeref Albayrak jî di nav de 29 kes hatin girtin.
Ekîbên Şaxa Têkoşîna Dijî Qaçaxçîtî û Sûcên Organîze ya Midûriyeta Ewlehiya Rihayê, bi koordînasyona Serdozgeriya Komarê ya Bîrecîkê di 24’ê Avrêlê de operasyonek dabûn destpêkirin. Di operasyonê de 46 kes hatibûn binçavkirin ku di nav wan de Şaredarê Berê yê AK Partiyê Şeref Albayrak, endamên berê yên encumena şaredariyê, xebatkarên şaredariyê û hinek esnaf hebûn.
29 Kes Hatin Girtin
Piştî qedandina karûbarên li ewlehiyê, gumanbar sewqî dadgehê hatin kirin. Dadgehê derbarê 29 kesan de, bi navê Şeref Albayrak jî, biryara girtinê da. Ji gumanbarên din 3 kes hatin berdan û 14 kes jî bi şertê kontrola edlî hatin azadkirin.
Sûcdarî: “Fesadî di Îhaleyan de”
Lêpirsîn li ser dema rêveberiya berê ya Şaredariya Halfetiyê hatibû destpêkirin. Gumanbar bi sûcên wekî “avakirina rêxistinê bi armanca sûckirinê” û “fesadiya di îhaleyan de”tên tawanbarkirin.
Di operasyona 24’ê Nîsanê de derbarê 51 gumanbaran de biryara binçavkirinê hatibû dayîn ku 28 ji wan wezîfedarên dewletê bûn. Hat ragihandin ku xebatên ji bo girtina gumanbarekî ku hê nehatiye dîtin berdewam dikin.
/Çavkanî: ÎlkeTv/
