🔴NÛPEL – Fermandarê Giştî yê Hêzên Sûriyeya Demokratîk (HSD) Mezlûm Ebdî, êrişa bi dronê ya li ser mala Serokê Herêma Kurdistanê Nêçîrvan Barzanî şermezar kir û ragihand ku ewlehî û aramiya Herêma Kurdistanê ji bo hemû Kurdan girîng e.
“Em li dijî gefan li kêleka Herêma Kurdistanê ne”
Mezlûm Ebdî li ser hesabê xwe yê medyaya civakî peyamek belav kir û nerazîbûneke tund nîşanî êrişa ku li bajarê Dihokê pêk hatibû da. Ebdî di peyama xwe de bal kişand ser yekrêziya Kurdan û wiha got:
“Em êrişa li dijî mala Serokê Herêma Kurdistanê Kak Nêçîrvan Barzanî şermezar dikin. Li beramberî gef û êrişan, em dê her tim li kêleka gel û rêveberiya Herêma Kurdistanê bin.”
“Ewlehiya Başûr erkê hemûyan e”
Fermandarê HSDyê destnîşan kir ku aramiya Başûrê Kurdistanê bandoreke rasterast li ser tevahiya herêmê û gelê Kurd dike. Ebdî di daxuyaniya xwe de tekez kir ku parastina vê aramiye wezifeyeke neteweyî ye û got:
“Ewlehiya Başûrê Kurdistanê erkê hemûyan e û aramiya wê aramiya tevahiya Kurdan û herêmê ye.”
Hûrguliyên êrişê
Mala Serokê Herêma Kurdistanê Nêçîrvan Barzanî ya li Dihokê, îro rastî êrişeke bi dronan hat. Li gorî agahiyan:
Êriş di roja bêhnvedanê de pêk hatiye.
Ji ber ku kes di malê de nebûye, ti zirarên canî çênebûne.
Li seranserî Kurdistanê û herêmê bertekên li dijî vê êrişê berdewam dikin.
/rd/
