🔴Serokê YNK’ê Bafil Talabani piştî hilbijartina Nizar Amedi wek Serokkomarê Iraqê peyamek weşand. Talabani di peyama xwe de bal kişand ser xeta Mam Celal û ji ber êrîşên ji axa Iraqê hatine kirin lêborîn xwest.
NAVENDA NÛÇEYAN (Nûpel) – Serokê Yekîtiya Niştimanî ya Kurdistanê (YNK) Bafil Talabani, bi boneya destbikarkirina Nizar Amedi wek Serokkomarê nû yê Iraqê, peyameke vîdyoyî bi zimanên Kurdî û Îngilîzî parve kir. Talabani di peyama xwe de peyamên girîng dan raya giştî ya navxweyî û navdewletî.
‘Xeta Mam Celal dê berdewam bike’
Talabani di destpêka peyama xwe de bi Kurdî axivî û spasiya Serokkomarê berê Abdulatif Reşid û hevjîna wî Şahnaz Îbrahim kir. Talabani destnîşan kir ku Nizar Amedi şagirtekî Mam Celal e û wiha got:
“Xeta Mam Celal dê berdewam bike. Amedi jî mîna Abdulatif Reşid dê di heman xeta siyasî de kar bike. YNK ji bo cîbicîkirina Destûra Iraqê û parastina yekrêziya welat her dem amade ye.”
Ji welatên cîran lêborîn xwest
Bafıl Talabani di beşa duyem a peyama xwe de bi Îngilîzî rûyê xwe zivirand civaka navdewletî û derbarê aloziyên herêmî de axivî. Talabani ji ber êrîşên ku ji axa Iraqê ve li dijî welatên Ereb hatine kirin lêborîn xwest û got: “Em ji ber van kiryaran fedî dikin û sersaxiyê ji malbatên qurbaniyan re dixwazin.”
Spasî ji bo Erdogan û Pakistanê
Serokê YNK’ê bal kişand ser hewildanên dîplomatîk ên ji bo kêmkirina rageşiya di navbera DYA û Îranê de. Talabani bi taybetî spasiya Serokkomarê Tirkiyeyê Recep Tayyip Erdogan, hikûmeta Pakistanê û welatên Ewropayê kir ku di proseya agirbest û diyalogê de roleke mezin lîstine. Talabani got: “Xwestina aştiyê ji şerkeriyê wêrektir e. Divê em spasiya cesareta Îran û DYA’yê bikin ku rûniştine ser maseya danûstandinan.”
‘Çek dê di destê dewletê de be’
Talabani derbarê hikûmeta nû ya Iraqê de jî nexşerêyek xêz kir û destnîşan kir ku armanca wan avakirina hikûmeteke welatparêz e:
Serweriya qanûnê: Çek dê tenê di destê dewletê de bin.
Aştî û Refah: Iraq dê ji şer û xwînrijandinê dûr bikeve û bi birayên xwe yên Ereb re hembêz bike.
Diyalog: Ev hevdîtinên niha dikarin bibin destpêka çareserkirina pirsgirêkên mezin ên Rojhilata Navîn.
Di dawiya peyama xwe de Talabani bi bîr xist ku ew wek Kurd “zarokên Selahedînê Eyûbî ne” û her dem amade ne piştgiriyê bidin proseyên aştiyê yên li herêmê.
