Berbanga vê sibehê, artêşa Îsraîlê li seranserî Îranê, bi taybetî li paytext Tehran, Kerec û Îsfehanê zincîreke êrişên hewayî pêk anî. Ev operasyon piştî êrişên mûşekî yên şeva borî yên Îranê û mûşekên ku ji Yemenê ber bi Îsraîlê ve hatin avêtin, pêk hat.
NAVENDA NÛÇEYAN (Nûpel) – Di navbera demjimêr 04:40 û 04:50î de (bi dema Tehranê), pêleke nû û dijwar a teqînan paytext Tehran û hinek bajarên stratejîk ên Îranê hejandin. Li gorî çavkaniyên herêmî, li taxên cuda yên welat zêdetirî 20 teqînên li pey hev hatine qeydkirin.
Li Paytext Tehranê Tirs û Geşedanên Mezin
Li Tehranê, herêmên rojava û başûrrojava bûn armanca sereke ya bombebaranê. Niştecîhên taxên Ekbatan, Şaran, Tehran-Ser û Meydana Olompîkê ragihandin ku ji ber tundiya teqînan cam û pencereyên malên wan hejiyane.
Her wiha li derdora Balafirgeha Mehrabadê, taxa Seadet Abadê û li başûrê paytextê (li herêmên Şar Rey û Xezaneyê) dengê mûşek û teqînên gelekî bihêz hatin bihîstin.
Êriş Belavî Bajarên Din Jî Bû
Hevdem ligel paytextê, bajarê Kerecê û herêmên wekî Fardîs û Mehrşehrê jî bi tundî hejiyan. Welatiyên li bajarên Robat Kerîm, Perend û Îslamşherê diyar kirin ku wan herî kêm 4 teqînên li pey hev bihîstine.
Li parêzgeha Îsfehanê jî, derdora demjimêr 04:42yan, du teqînên mezin li nêzîkî Necef Abad û navenda bajêr pêk hatin. Şahidên rûdanê didin zanîn ku di van êrişan de navendên leşkerî yên herêmê hatine armanckirin. Heta niha raddana fermî ya li ser hejmara kuştî û birîndaran nehatiye kirin.
Supaya Pasdaran Êriş Piştrast Kir
Supaya Pasdaran a Îranê daxuyaniyek belav kir û piştrast kir ku “dijminê siyonîs” bi mûşekên balîstîk êrişî hinek cihên xaka welat kiriye. Hat ragihandin ku ev êriş weke bersivdayîna êrişên mûşekî yên şeva borî yên Îranê yên li ser Îsraîlê hatiye encamdan.
Eniya Yemenê û Rewşa li Îsraîlê
Li aliyê din, artêşa Îsraîlê ragihand ku ji Yemenê ve jî mûşek ber bi xaka wan ve hatine avêtin û pergalên parastina hewayî hatine çalakirin. Ev êriş, piştî agirbesta destpêka nîsana îsal, weke yekemîn êrişa ji Yemenê ya li ser Îsraîlê hat qeydkirin.
Piştî operasyonê, artêşa Îsraîlê daxuyand ku metirsiya li ser welat bi dawî bûye û welatî dikarin ji stargehan derkevin.
