NÛPEL – Parêzgarê Hesekê Nûredîn Ehmed ji Rûdawê re ragihand ku îro 28 dîlên Yekîneyên Parastina Jinê (YPJ) hatine berdan û şervanên jin li bajarokê Şedadê hatine radestkirin.
Ehmed destnîşan kir ku ev gav di çarçoveya hewlên ji bo xurtkirina aramî û aştiya civakî ya li herêmê de hatiye avêtin.
Banga ji bo welatiyan: “Bi ti awayî guleyan bernedin”
Parêzgarê Hesekê bi rêya Rûdawê bangî welatiyan kir ku ji bo pîrozkirina azadbûna şervanan şahiya xwe bi berpirsyarî nîşan bidin, pêbendî qanûn û rêbazan bin û bi ti awayî guleyan bernedin da ku ewlehî û aramiya herêmê parastî bimîne.
Berdana şervanên HSDyê di rojevê de ye
Nûredîn Ehmed her wiha eşkere kir ku hewl û hevahengî didomin da ku di demeke nêz de komeke din a şervanên Hêzên Sûriyeya Demokratîk (HSD) jî were berdan. Tevî ku hûrgiliyên vê mijarê hîn bi temamî zelal nebûne jî, xebat bi giranî tên meşandin da ku ev pirsgirêk bi yekcarî were çareserkirin.
