NÛPEL – Parêzerê malbata Gulistan Dokuyan, Alî Çîmen, derbarê gumanbarê sereke yê dozê de daxuyaniyeke balkêş da.
Ev daxuyanî li ser îdiayên “têkiliya gumanbarê sereke bi keçên temenbiçûk re” bû.
Çîmen bang li kesên ku bûyerên wiha jiyane kir û got: “Wêrek bin, derkevin holê.”
“Dayîkekê telefonî min kir”
Parêzer Alî Çîmen ji ser hesaba xwe ya platforma medyaya civakî X parvekirinek kir.
Çîmen diyar kir ku dayîkekê telefonî wî kiriye û tiştên ku serê wê hatine jê re vegotine.
Li gorî agahiyên ku Çîmen daye, dayîkê gotiye ku keça wê ya temenbiçûk ji bo betlaneyê li cem dapîra xwe maye.
Dayîkê keça xwe ji wir hildaye, lê di derketina Dêrsimê de wesayîta wan ji aliyê wesayîtên zirxî ve hatiye rawestandin.
Dayîkê îdia kir ku wan bi hinceta “Fermana parêzer heye” keça wê ji bo demekê ji wê veqetandiye.
“Têkiliya wê bi gumanbarê sereke Mustafa re heye”
Alî Çîmen da zanîn ku dayîkê îdia kiriye ku têkiliya keça wê bi gumanbarê sereke yê doza Gulistan Dokuyan, Mustafa S. re heye.
Çîmen her wiha eşkere kir ku di dema bûyerê de xebatkarên Polîtîkayên Civakî jî li wir bûne.
Çîmen di parvekirina xwe de got ku dayîkê ew qas wêrekî nedîtibû ku derkeve pêşiya raya giştî û wiha pê de çû:
“Bawerî bi min bînin. Ew gumanbarên ku hûn niha jê ditirsin û nikarin derkevin holê, di hucreyên xwe de dilerizin û li benda darizandinê ne.
Civak amade ye we hembêz bike. Li malbata Dokuyan binêrin, li welêt her kes li cem wan e. Dor a we ye, dema we ya hesabpirsînê hatiye.”
“Artêşeke parêzeran amade ye ku we biparêze”
Çîmen anî ziman ku ew amade ne piştgiriya hiqûqî bidin mexdûrên din jî û di daxuyaniya xwe de bang kir:
“Em dê li cem we bin. Artêşeke parêzeran amade ye ku we biparêze. Wêrek bin û derkevin holê. Veşartiya we jî dê were parastin.”
Çavkanî: Rûdaw
