NÛPEL – Îran amadekariya pêngaveke nû ya stratejîk dike ku tê de çûn û hatina ji Tengava Hurmizê bixe bin kontroleke tundtir. Serokê Komîteya Avakirinê ya Parlamentoya Îranê, Mihemed Riza Rezayî Koçî, ragihand ku pêşnûmeyeke yasayî ya berfireh hatiye amadekirin û dê di demeke nêzîk de ji aliyê parlamentoyê ve were pesendkirin.
Li gorî daxuyaniyên Koçî ji bo medyaya fermî ya Îranê, ev projeya nû dê desthilatdariya Îranê ya li ser vê rêrêwa avî ya navneteweyî bi awayekî berçav zêde bike.
Çar Mercên Sereke yên Derbasbûnê
Di pêşnûmeyê de ji bo keştiyên bazirganî û yên petrolê çar xalên serekî wekî “merc” hatine destnîşankirin:
Qedexeya li ser Îsraîlê: Derbasbûna her keştî yan barên ku têkiliya wan bi Îsraîlê re hebe, bi temamî tê qedexekirin.
Destûra Taybet ji bo “Neyaran”: Keştiyên welatên ku Îran wan wekî “dijmin” pênase dike, tenê bi destûra taybet a Encumena Bilind a Ewlehiya Niştimanî dikarin derbas bibin.
Telafîkirina Zeraran: Ew welatên ku zirar gihandine Îranê, heta ku wan zeraran telafî nekin, mafê wan ê derbasbûnê nîne.
Baca bi Riyal: Ji bo derbasbûnê baca taybet tê standin û divê ev bac bi diravê fermî yê Îranê (Riyal) were dayîn.
Dahat Dê li Ku Were Xerckirin?
Li gorî hûrgiliyên pêşnûmeyê, dahata ji vê bacê bi vî rengî tê dabeşkirin:
%30: Ji bo bihêzkirina binesaziya leşkerî û şiyanên hêzên çekdar.
%70: Ji bo başkirina rewşa aborî û debara xelkê Îranê.
Girîngiya Stratejîk a Tengavê
Tengava Hurmizê ji bo bazirganiya enerjiyê ya cîhanê xaleke krîtîk e. Ji ber rageşiyên dawî yên di navbera Îran, Amerîka û Îsraîlê de ku ji 28ê Sibatê ve gur bûne, Îranê ev tengav girtiye. Rayedarên Îranî tekez dikin ku êdî kontrola tam a vê herêmê di destê hêzên wan ên çekdar de ye.
/Çavkanî: Rûdaw/
