🔴AMED (Nûpel) – Dersên taybet ên spor û perwerdeyê li Navenda Jiyana Bi Hev Re ya Musa Anter ku ji aliyê Gerînendetiya Xizmetên Astengdar û Kalûpîran a Şaredariya Peyasê ve tê birêvebirin, bi awayekî girîng alîkariya pêşketin û jêhatîbûna zarokan dikin.
Li vê navenda ku di bin sîwana Gerînendetiya Xizmetên Astengdar û Kalûpîran de kar dike, bi amûrên taybet perwerdeya sporê tê dayîn. Ev perwerde; çelakî, hevsengî, hêza masûlkan û hevrêziya dest-çav-laş bi pêş dixe û bandoreke erênî ya mezin li ser pêşketina fîzîkî ya zarokan dike.
Bi Rêya Pisporan Kursên Perwerdeyê
Li heman navendê, bi rêya çalakiyên ku ji bo pêşxistina şiyanên têgihiştin û afirîneriyê hatine amadekirin, piştevaniyeke girîng li pêşketina zîhnî ya zarokan tê kirin. Di nav perwerdehiyê de ev ders tên dayîn:
Temrînên xêzkirinê
Naskirina tîp û hejmaran
Perwerdeya xwendin û nivîsandinê
Lêkdan û jêdanên hêsan
Fêrbûna rengan
Bi rêya wêneyan naskirina tişt û ajalan
Bikaranîna kartên bîrê û dersên hunerê
Ev hemû xebat jêhatîbûn û şiyanên têgihîştinê yên xwendekaran bi xurtî pêş dixin.
Malbat: “Em Pêşketinê Dibînin!”
Dê û bavên zarokên ku li Navenda Jiyana Bi Hev Re ya Musa Anter perwerde dibînin, diyar dikin ku ew bi kêfxweşî pêşketina zarokên xwe ji nêz ve dişopînin. Malbat ji vê xizmeta ku ji aliyê şaredariyê ve tê pêşkêşkirin, pir razî ne.
