NÛPEL – Di çarçoveya Kûpaya Cîhanê ya FIFA 2026’an de, di maça Koma I’ê ya di navbera Fransa û Iraqê de, Fransa bi encama 3-0 bi ser ket û derbaskirina xwe ya ji komê mîsoger kir.
Maça ku li Stadûma Philadelphia ya li bajarê Philadelphia yê DYE’yê hat lîstin, ji aliyê hakemê Kanadayî Drew Fischer ve hat birêvebirin.
Maç ji ber rewşa hewayê hat rawestandin
Fransa bi gola Kylian Mbappe ya di deqîqeya 14’an de, nîvê yekem bi 1-0 pêşeng temam kir. Lêbelê, digel qedandina nîvê yekem, bahoz, barana zêde û şeqqên birûskê bandora xwe zêde kirin. Ji ber sedemên ewlehiyê, rayedaran ji temaşevanan xwestin ku stadyumê vala bikin û lîstikvan neşandin nîvê duyemîn, bi vî awayî maç demkî hat rawestandin.
Destpêka nîvê duyemîn di saet 03.00’an de pêk hat
Piştî ku bandora rewşa neyînî ya hewayê kêm bû, nîvê duyemîn ê maçê di saet 03.00’an de dest pê kir.
Di nîvê duyemîn de Fransa serweriya xwe domand; di deqîqeya 54’an de Mbappe gola xwe ya duyemîn û di deqîqeya 66’an de jî Dembele gola sêyemîn tomar kirin. Bi vê encamê Fransa maça xwe bi 3-0 bi serkeftî qedand û bi vî awayî piştrast kir ku wê ji komê derkeve.
Norwêc bi Haaland derbasî qonaxa 32’an bû
Di maça Koma I’ê de, Norwêc li Stadyuma MetLife a New Jerseyê bi Senegalê re hat hemberî hev. Norwêcê bi serkêşiya Erling Haaland bi encama 3-2 bi ser ket û serkeftina xwe ya ji bo qonaxa 32’an misoger kir.
Golên Norwêcê di deqîqeya 43’an de ji aliyê Pedersen ve hatin tomarkirin. Di nîvê duyemîn de, stêrka cîhanê Erling Haaland bi du golên xwe (deqîqeyên 52 û 58) tîma xwe derxist pêş. Her çend Senegalê bi golên Ismaila Sarr (deqîqeyên 53 û 90+2) hewl da ku vegerê, lê ev yek ji bo guhertina encamê têrê nekir. Bi vê serkeftinê, Norwêc piştî Fransa bû duyemîn tîma ku ji komê derdikeve.
Cezayîrê encam berevajî kir
Di Koma J’ê de, Cezayîrê di maça dijwar a li hemberî Urdunê de, bi paşvegerandina encamê bi 2-1 bi ser ket. Urdunê di deqîqeya 36’an de bi gola Al-Rashdan 1-0 pêş ketibû û nîvê yekem bi vî awayî qedandibû.
Lê belê di nîvê duyemîn de Cezayîrê kontrola lîstikê girt destê xwe. Di deqîqeya 69’an de Ahmed Benbouali rewş kir 1-1 û di deqîqeya 82’an de jî Amine Gouiri gola serkeftinê tomar kir. Bi vê encamê Cezayîrê yekemîn serkeftina xwe ya di komê de bi dest xist, Urdun jî bi vê têkçûnê ji turnuvayê hat xatirxwestin.
