ÎZMÎR (Nûpel) – Ji bo Zeynep Cansiz, dayika Sakîne Cansiz ku yek ji pêşengên PKK’ê bû, li Îzmîrê bi beşdariya girseyî konê sersaxiyê hat vegirtin. Beşdarên merasîmê soz dan ku ew ê xewna Cansiz a ji bo aşitiyê pêk bînin.
Zeynep Cansiz, dayika fîgurê naskirî Sakîne Cansiz, piştî demeke dirêj ku li nexweşxaneyê dihat dermankirin, îro serê sibê koça dawî kir. Piştî nûçeya wefata wê, li Cemxaneya Evka 2 ya navçeya Çîglî ya Îzmîrê konê sersaxiyê hat danîn.
Beşdariyeke Berfireh Çêbû
Merasîma sersaxiyê bû cihê kombûna gelek kesan. Parlamentera DEM Partiyê ya Îzmîrê Burcugul Çubuk, aktîvîstên Tevgera Jinên Azad (TJA), Meclîsa Dayikên Aşitiyê, nûnerên partiyên siyasî û saziyên sivîl tevî gelek welatiyan beşdarî şînê bûn.
‘Heya Aşitî Neye Em ê Têbikoşin’
Di merasîmê de li ser navê Dayikên Aşitiyê Peyrûze Kurt axaftinek kir. Kurt bal kişand ser rola dîrokî ya Sakîne Cansiz û berxwedana wê ya li Girtîgeha Amedê û wiha got:
“Dayika Zeynep heya nefesa xwe ya dawî daxwaza aşitiyê kir, lê mixabin bêyî ku aşitiyê bibîne çavên xwe girtin. Dayika Zeynep dayika pêşenga me Sakîne Cansiz bû. Em li vir soz didin te; ew aşitiya ku te nedît, em ê bînin ser vê axê. Heya aşitî neyê vî welatî, têkoşîna me wê berdewam bike.”
Cenaze ber bi Dersîmê ve Hat Birêkirin
Piştî merasîma ku bi lorîn û beytên olî bi dawî bû, jinan darbesta Zeynep Cansiz girtin ser milên xwe. Cenaze ji bo ku li axa wê ya zayînê, li Dersîmê were veşartin, birin Balafirgeha Adnan Menderes a Îzmîrê.
/Çavkanî: AW/
