🔴AMED (Nûpel) – Merasîma danîna kevirê bingehîn a tesîseke civakî li tenişta Nexweşxaneya Perwerde û Lêkolînê ya Gazî Yaşargîl a li navçeya Peyasê hate lidarxistin. Ev tesîs dê ji bo xizmên nexweşan, karmendên nexweşxaneyê û lênihêrîneran bi bihayekî guncaw xizmetê pêşkêş bike.
Şaredariya Peyasê vê tesîsa civakî li nêzî nexweşxaneyê ava dike; cihê ku rojane bi hezaran kes ji hundir û derveyî bajêr ji bo xizmetên tenduristiyê serdana wê dikin. Di merasîmê de Hevşaredarên Peyasê Bêrîvan Gulşen Sîncar û Cengîz Dündar, hevserokên DEM Partiyê yên navçeya Peyasê, nûnerên rêxistinên civakî, komele û gelek welatî beşdar bûn.
Ji Bo Bicihanîna Pêdiviyên Bingehîn Cîhekî Civakî
Hevşaredar Bêrîvan Gulşen Sîncar di axaftina xwe de bal kişand ser girîngiya projeyê û got:
“Me dît ku hejmareke mezin ji mirovan ji herêm û bajarên derdorê tên û pêdiviyên wan bi hêsanî nayên bicihanîn. Ji ber vê yekê me ev proje xist meriyetê. Li gorî rêziknameya rêveberiya herêmî ya DEM Partiyê, em tevî hemû astengiyan jî xizmetên mirov-navendî pêşkêş dikin û xebatên xwe yên rêveberiya herêmî yek bi yek pêk tînin.”
Hevşaredar Cengîz Dundar jî wiha axivî:
“Em xebatên xwe yên ji bo çareserkirina pirsgirêkên gel û pêşkêşkirina xizmetên li gorî pêdiviyên rastîn didomînin. Ev avahî dê xizmetên jiyanî bi awayekî erzan û ewle pêşkêşî gel bike û wekî qadeke ewle bibe xizmetkara gel.”
Piştî axaftinan, bi awayekî fermî kevirê bingehîn ê avahiyê hate danîn.
Xizmeteke Hem Erzan Hem Jiyanî
Tesîsa ku bingeha wê hatiye danîn, tê payîn ku di hundirê vê salê de were temamkirin û bikeve xizmeta gel. Taybetmendiyên tesîsê wiha ne:
Rûber: Tesîs li ser qadeke 4.750 metreyî ava dibe.
Avahî: Avahî dê yek-qatî be û rûbereke girtî ya 260 metreyî hebe.
Qada Kesk: Li kêleka tesîsê, parkek û qadeke şîn a mezin ku ji 92.000 metreyî pêk tê, tê avakirin.
Di hundirê avahiyê de kafeterya û salona xwarinê dê hebin ku li wir rojane xwarinên tendurist, hîjyenîk û bi bihayê maqûl bên pêşkêşkirin. Bi mîmariya xwe ya nûjen, cihên rûniştinê yên fireh û sêwirana gihîştî, armanc ew e ku hawîrdorek rehet ji bo mirovên her temenî were afirandin. Ev der ne tenê ji bo xizmên nexweşan, lê di heman demê de ji bo karmendên nexweşxaneyê jî dê bibe qadeke bêhnfirehiyê.
