NAVENDA NÛÇEYAN (Nûpel) – Ji ber zêdebûna şer û pevçûnên li Tengava Hurmuzê û aloziya di navbera DY-Îranê de, bihayê bermîla petrola Brent %6 zêde bû û ji 114 dolarî derbas bû. Ji destpêka şer û vir ve zêdebûna bihayê petrolê %50 derbas kiriye.
Agirbesta şidokî ya di navbera Dewletên Yekbûyî yên Amerîkayê (DY) û Îranê de, bi pevçûnên li Tengava Hurmuzê re careke din serserî bû. Ev rewş bû sedema erdhejekê di bazarên enerjiyê de û bihayê petrola Brent bi rengekî berbiçav bilind bû.
Pevçûnan Bazar Tetikandin
Piştî ku artêşa DY’yê daxuyand ku wan wek bersiv 6 keştiyên piçûk ên Îranê îmha kirine û daxuyaniya Îmaratê ya derbarê êrişên mûşekî û ÎHA’yan de, fikarên li ser ewlehiya gerdûnî zêde bûn. Her çend Îran daxuyaniyên DY’yê derewandibe jî, bandora vê rageşiyê rasterast li ser bihayan xuya kir.
Trafîka Keştiyan Sekiniye: 20 Hezar Deryavan Mahsur Man
Serokê DY’yê Donald Trump diyar kir ku ew ê ji bo keştiyên bazirganî parastina leşkerî peyda bikin, lê tevî vê daxuyaniyê jî trafîka deryayî hîna venegeriyaye rewşa asayî. Federasyona Karkerên Veguhastina Navneteweyî bang kir ku bêyî garantiyeke tam a ewlehiyê divê keştî di tengavê re derbas nebin.
Li gorî daneyên Rêxistina Deryaçvaniyê ya Navneteweyî:
Nêzî 2 hezar keştî li herêmê rawestiyane.
Nêzî 20 hezar deryavan di nav van keştiyan de mahsur mane.
Neteweyên Yekbûyî hişyarî da ku girtina tengavê rê li ber veguhastina petrol, gaz û kelûpelên krîtîk digire û aboriya cîhanê dixe xetereyê.
Kêmasiya Hilberînê û Pêşbîniyên Pêşerojê
Ji destpêka şerê ku di dawiya Sibatê de dest pê kiribû heta niha, bihayê bermîla petrola Brent zêdetirî %50 zêde bûye. Tê texmînkirin ku rojane 14,5 mîlyon bermîl kêmasiya hilberînê heye.
Pispor û analîstên enerjiyê destnîşan dikin ku heta lihevkirinek pêk neyê û welat dest bi bikaranîna stokên xwe yên enerjiyê nekin, dê zexta li ser bihayan berdewam bike û dibe ku biha hîn bilindtir bibin.
