NÛPEL – Heyeta Îmraliyê ya DEM Partiyê nirxandinên Rêberê PKK’ê Abdullah Ocalan ên di hevdîtinê de belav kir. Abdullah Ocalan diyar kir ku di her warê civakî de xitimandinek heye, lewma ew di pêvajoyê de israr dikin û lezê dikin û wiha got: “Dema me ya ku em winda bikin tune ye. Ez bawer im hemû aktor dê bi vê berpirsyariya dîrokî tevbigerin û Meclîs jî dê xebatên xwe bi vê hesasiyetê bi rê ve bibe. Çarçoveya qanûnî dikare bingeha pêvajoyê ava bike. Ez bang li her kesî dikim ku piştgiriyê bide pêvajoya Aştî û Civaka Demokratîk.”
Heyeta Îmraliyê ya DEM Partiyê ku ji parlamentera Wanê Pervîn Buldan, parlamenterê Rihayê Mithat Sancar û endamê Buroya Hiqûqê ya Sedsalê Faîk Ozgur Erol pêk tê, duh li Girava Îmraliyê bi Rêberê PKK’ê Abdullah Ocalan re hevdîtinek pêk anî. Hevdîtin piştî du mehan pêk hat. Heyetê derbarê hevdîtinê de daxuyaniyeke nivîskî belav kir. Di daxuyaniyê de hate diyarkirin ku wan duh li Girava Îmraliyê bi Abdullah Ocalan û hevalên wî re hevdîtin pêk aniye. Nirxandinên Abdullah Ocalan ên derbarê hevdîtinê de di daxuyaniyê de hatin parvekirin.
Nirxandinên Rêberê PKK’ê Abdullah Ocalan bi vî rengî ne:
“Civakên ku xwedî hêrseke mezin in, bêyî fikir û nirxên etîk nayên veguherandin. Civak li hemû qadên jiyanê; ji etîkê bigire heta siyaset, hiqûq û aboriyê xitimandinekê dijî. Lewma em di pêvajoyê de israr dikin û lezê dikin.
Ez weha difikirim ku kononjuntura Rojhilata Navîn ji her tiştî re vekirî ye. Dewletên wekî Îsraîl û Îranê tûj dibin û weha xuya dike ku dê hê tûjtir jî bibin. Li Rojhilata Navîn xurtkirina neteweperestiyê, jihevveqetandin û mezinkirina neteweperestiya teng zerarê dide. Em pêvajoyeke ku çavdêriya geşedanên bi rîsk dike, pêşî li vê digire û hesabên xwîndariyê ji holê rake bi rê ve dibin. Helbet ya girîng ew e ku hemû tiştên tên kirin bi qanûnan bên mîsogerkirin. Li bendê man û tevgerîna bi bendewariyê tenê xetereyan derdixîne. Dema me ya ku em winda bikin tune ye. Ez bawer im hemû aktor dê bi vê berpirsyariya dîrokî tevbigerin û Meclîs jî dê xebatên xwe bi vê hesasiyetê bi rê ve bibe.
Çarçoveya qanûnî dikare bingeha pêvajoyê ava bike. Sererastkirina qanûnan dê bibe pêvajoya avakirina înşayeke pozîtîf a rasteqîn û demokrasiyê. Demokratîkbûyîn pêdiviyeke bingehîn e û serkeftina pêvajoyê me nêzî vê armancê dike.
Gelo ketina bi zorê ya navenda giştî ya partiyeke siyasî, bi şikandina deriyê wê yê bi balyozê, li gorî rêbazên demokrasiyê ye? Pêkanînên li ser Partiya Gel a Komarê (CHP) û geşedanên ku diqewimin, bi nebûna demokrasiyeke rast û siyaseteke demokratîk re têkildar in. Sedema ku rewş anî vê astê, bêparbûna ji prensîba demokrasiyê ya di bingeha komarê de ye. Encamên nêzîkbûna li demokrasiyê mîna ku luksek, demagojiyek an jî gotegotek be û piçûkdîtina demokrasiyê şaşiyeke giran û girîng e. Ti rewşeke ku bi qasî pêşxistina pênaseya demokratîk a komarê lezgîn be, nîn e.
Em di vî welatî de hewl didin ku zemîna vê pêş bixin û îmkanên wê mezin bikin. Dema ku em li Îmraliyê ber bi çareseriyê û ber bi gavên qanûnî ve diçin, amadekirina komarê ji bo derketineke demokratîk û hiqûqeke demokratîk pir girîng dibînin. Em vê wekî gaveke ji bo jiholêrakirina kêmasiya demokrasiyê ya di nav partiyê de û di navbera partiyan de jî dibînin. Divê beramberiya hemû hewldanan; gihandina komarê ya bi naverok û çandeke demokratîk û avakirina pergaleke saxlem a hiqûqî, bibe erkeke sereke. Li ser vê bingehê ez bang li her kesî dikim ku piştgiriyê bide pêvajoya Aştî û Civaka Demokratîk.
Ev e wateya entegrasyona Kurdan a di komara demokratîk de. Em hewl didin rewşeke ku bi salan e ji ber meseleya Kurdî asê maye, derbas bikin. Hêmana şîdetê ya ku ji meseleya Kurdî çavkaniya xwe digire, bi sîstematîka çareseriyê tê derbaskirin. Em dikarin ji vê pêvajoyê re pêvajoya ji nû ve birêkûpêkkirin, nûjenkirin û modernîzekirina têkiliyên Tirk û Kurdan jî bibêjin.
Peyamên ronakbîr û akademîsyenên navneteweyî yên ku piştgirî dane pêvajoya Aştî û Civaka Demokratîk, kirin pirtûk. Di vê çarçoveyê de ez dixwazim destnîşan bikim ku ez amade me her cure pêşniyar, rexne û tevkariyan bi awayê herî hûrgulî binirxînim. Di vê serdemê de ku herî zêde pêdiviya me bi aştî û demokrasiyê heye, ji bo piştgiriya wan a pir girîng, ez silav li wan hemûyan dikim.”
Çavkanî: MA
