Mufetîşiya Giştî ya Operasyona Biryardariya Xwezayî ya Dewletên Yekbûyî yên Amerîkayê (DYA), raporek li ser rewşa endamên DAIŞ’ê yên li Sûriyê weşand.
Li gorî raporê, cihê 20,000 kesên bi DAIŞ’ê ve girêdayî ku piştî vekişîna Hêzên Sûriya Demokratîk (QSD) ji kampa Holê reviyabûn, nayê zanîn.
Rapora Mufetîşê Giştî yê Dewletên Yekbûyî yên Amerîkayê ku çaryeka yekem a 2026’an vedihewîne, piştrast kir ku kontrol bi tevahî li kampa navdar a Holê ya li Hesekê winda bûye û revên girseyî pêk tên.
Kampa Holê hat talankirin û 20 hezar kes reviyane
Di meha çileyê de, yekîneyên QSD’ê ku ji bo alîkariya eniyên şer çûn pêşiya pêşveçûna artêşa Hikûmeta Veguhêz a Sûriyê, neçar man ku ji baregehên xwe yên li Kampa Holê derkevin .
Malbatên DAIŞ’ê, bi sûdwergirtina ji valahiya ewlehiyê ya mezin a ku çêbû, kamp şewitandin, talan kirin û piştre bê şop winda bûn .
Di raporê de hat destnîşankirin ku bi qasî 20,000 kes bi rêya torên qaçaxiyê di ser Îdlibê re ber bi bakurê Sûriyê ve hatine belavkirin .
Endamên xeternak ên DAIŞ’ê reviyane
Ne tenê malbat, lê herî kêm 150 endamên payebilind û xeternak ên DAIŞ’ê yên ku di girtîgehan de bûn jî, karîn birevin.
Artêşa Amerîkayê ji ber fikarên xwe yên ji ber pêla zêde ya revînan, 5,700 endamên DAIŞ’ê ku di zindanên Sûriyê de girtî ne, bi awayekî bilez veguhastine zindanên ewlehiya bilind ên li Îraqê.
Metirsiya zindîbûna DAIŞ’ê di rojevê de ye
Rapora weşandî piştrast kir ku hevkariya stratejîk a DYA-QSD’ê, ku ji sala 2014’an û vir ve berdewam dike, li ber çavan rastiyên li ser erdê yên bibandor bi dawî bûye.
Rayedarên îstîxbarata Amerîkî hişyarî dane ku nebûna çavdêriyê derfet daye DAIŞ’ê ku li eniyên Sûriye û Îraqê ji nû ve kom bibe û “avahiyên şaneyan” ava bike.
Pentagon bifikar e ku ewlehiya kamp û zindanên stratejîk, ku berê ji aliyê QSD’ê ve bi piştgiriya çekên giran ên Amerîkî dihatin parastin, bikeve destê hikûmeta Şamê.
Pispor tekez dikin ku karîna hikûmeta Sûriyê ji bo parastina van dezgehên hestyar qels e û pêleke nû ya revînan dikare herêmê rastî gefeke cîhanî bîne.
Bi êrîşên li ser Rojava re DAIŞ’î reviyane
Berî pêşveçûna komên girêdayî Artêşa Hikûmeta Veguhêz a Sûriyê di dawiya sala 2025’an de, gefa DAIŞ’ê li Bakur û Rojhilatê Sûriyê bi giranî hatibû kontrolkirin û bi hezaran endamên DAIŞ’ê û malbatên wan di girtîgeh û kampên li jêr kontrola Hêzên Sûriya Demokratîk (QSD) de dihatin girtin.
Li gorî daneyên ji nîvê sala 2025’an ve, 8,950 endamên DAIŞ’ê di girtîgehê de bûn.
Nêzîkî 5,400 ji wan Sûrî, 1,550 Îraqî û nêzîkî 2,000 jî biyanî ku ji zêdeyî 60 welatan bûn.
Ev kes di zêdeyî 14 dezgehan de, di serî de Zindana Şedadê, girtîgehên ewlehiya bilind ên li Hesekê, girtîgehên li Reqayê û navendên din ên girtinê, dihatin girtin.
Ev girtîgeh ji hêla derdorên ewlehiyê yên navneteweyî ve, di nav dozên terorîzmê yên herî hestyar ên cîhanê de dihatin hesibandin.
/cawkani: nucetv.net/
