NAVENDA NÛÇEYAN (Nûpel) – Li herêma Kendava Hurmizê ku demeke dirêj e bi rageşiyan di rojevê de ye, îşev dengê teqînên li pey hev hatin bihîstin. Li gorî agahiyên ku ji medyaya fermî ya Îranê hatine girtin, li nêzî bajarê Bandar Abbas û Girava Qeşmê teqînên dijwar pêk hatine.
Li Herêmê Rewşa Alarmê
Televîzyona dewletê ya Îranê ragihand ku li derdora bendera stratejîk a Bandar Abbasê çend dengê teqînan hatine bihîstin. Her wiha Ajansa Nûçeyan a Mehrê jî diyar kir ku li Girava Qeşmê jî dengê teqînan bilind bûye. Piştî van geşedanan, hêzên ewlehiyê yên li herêmê derbasî rewşa “alarmê” bûn.
Îskela Geştyariyê Hat Armancgirtin
Li gorî nûçeya medyaya dewletê IRIB’ê, teqînek li Îskela Geştyariyê ya Bahmanê ku li Girava Qeşmê ye, pêk hatiye. Hat bibîrxistin ku ev îskele berê jî di êrîşên DY-Îsraîlê de bibû armanc. Di nûçeyê de hat destnîşankirin ku di dema teqînan de li asîmanê herêmê gelek balafirên bêmirov (SÎHA) hatine dîtin.
Îdîayên Êrîşên Hewayî
Her çend heta niha rayedarên Îranê derbarê sedema teqînan û windahiyên canî de daxuyaniyeke fermî nedabe jî, li ser medyaya civakî û hinek çavkaniyên herêmî îdîayek hate belavkirin. Li gorî van îdîayan, balafirên şer ên DY û Mîrnişînên Ereb ên Yekbûyî (MAE) bi fuzeyan êrîşî bajarên benderê yên Îranê kirine.
Heta niha tevgeriya li herêmê û asîmanê Kendava Hurmizê bi dijwarî berdewam dike.
