MÊRDÎN (Nûpel) – Li bajarê Mêrdînê bi beşdariya pênc saziyên sivîl û çandî, platformeke nû ya bi navê “Platforma Ziman, Çand, Huner û Wêjeya Mêrdînê” hat avakirin. Platformê çalakiya xwe ya yekem di pîrozbahiyên 1’ê Gulanê de li dar xist.
Hevgirtina Pênc Saziyan
Ji bo parastin û pêşxistina nirxên kurdewarî li herêma Mêrdînê, pênc komeleyên girîng hatin bal hev û banê platformê ava kirin. Saziyên ku di nav vê platformê de cih digirin ev in:
• KOM-KURD (Komeleya Zimanê Kurdî ya Mezopotamyayê)
• Komeleya Çand û Hunerê ya Mezopotamyayê
• SOZDER (Komeleya Lêkolînên Çand, Dîrok û Wêjeya Devkî)
• Komeleya Wêjekarên Kurd
• RENGÎN (Komeleya Çand, Huner û Ziman)
Çalakiya Yekem: 1’ê Gulanê
Platforma ku nû hatiye avakirin, ragihand ku armanca wan xurtkirina xebatên çandî û hunerî yên li bajêr e. Endamên platformê bi daxuyaniyekê beşdarî bernameya 1’ê Gulanê Roja Karker û Kedkaran bûn û bi rengên xwe piştgirî dan karkeran. Ev gava pêşîn wekî nîşaneya tekoşîna çandî û civakî ya platformê hat nirxandin.
Peyama Platformê ya 1’ê Gulanê
Ziman û çanda kurdî, nirxên herî bingehîn û jêneger ên neteweya kurd û hemû mirovahiyê ne. Ziman û çanda kurdî hê jî di asta fermî de nayên qebûlkirin; bi rê û rêbazên nûjenkirî yên cur bi cur tên tunehesibandin, qedexekirin û bi polîtîkayên pişaftinê re rû bi rû ne. Lê belê di encama têkoşîna neteweya kurd de ev hewldan têk çûn.
Ziman û çanda me; çavkaniya me ya bingehîn a hebûn, xwebûn, nasname û jiyana me ya neteweyî, azad û demokratîk e. Di şexsê pêşengên ziman û çanda kurdî de, 1’ê Gulanê Cejna Karker û Kedkaran li me û li hemû mirovahîparêzan pîroz be!
Armanca Platformê
Tê payîn ku ev platform di demên pêş de li Mêrdînê li ser mijarên wekî perwerdehiya zimanê kurdî, parastina mîrata çandî, berhevkirina wêjeya devkî û lidarxistina çalakiyên hunerî xebatên berfireh bimeşîne.
