🔴 NAVENDA NÛÇEYAN (Nûpel) – Serokê Ajansa Enerjiya Nukleerê ya Rûsyayê (Rosatom), Alexey Likhachev ragihand ku welatê wî ji ber metirsiya êrişên asmanî, piraniya karmendên xwe yên li Santrala Nukleerê ya Bûşehrê ya Îranê vekişandine.
Pêvajoya Vekişînê Dest Pê Kir
Likhachev ji medyaya Rûsyayê re axivî û diyar kir ku pêvajoya dawî ya vegerandina karmendan dest pê kiriye. Li gorî daxuyaniyê:
108 karmend bi temamî vegeriyane Rûsyayê.
Tenê 20 kes li santralê mane ku ew jî birêvebirên bilind û berpirsên ewlehiya amûran in.
Hişyariya “Karesata Ji Çernobîlê Wêrankertir”
Moskowê sedema vê biryarê wekî “parastina canê karmendan” nîşan da. Rayedarên Rûs hişyarî didin ku heke Amerîka an jî Îsraîl êrişî santralê bikin, dê karesateke radyasyonê rû bide. Rûsyayê destnîşan kir ku encamên êrişeke wiha dikare ji karesata navdar a Çernobîlê wêrankertir be.
Rewşa Santralê û Rageşiya Leşkerî
Santrala Bûşehrê ku li başûrê Îranê ye û ji aliyê Rûsyayê ve hatî avakirin, di dema şerê dawî de herî kêm 5 caran bûye armanca êrişan. Tevî ku di van êrişan de parêzvanekî santralê jiyana xwe ji dest daye, Ajansa Enerjiya Nukleerê ya Navneteweyî piştrast kir ku heta niha ziyana rasterast negihiştiye navenda nukleerê.
Di Bin Sîberê Agirbestê de Rewşek Tevlihev
Ev biryara Rûsyayê di demekê de tê ku piştî şerê 40 rojan ê di navbera Îran, Amerîka û Îsraîlê de, bi navbeynkariya Pakistanê agirbesteke 2 hefteyan hatiye ragihandin. Washington û Tel Evîv her tim dubare dikin ku ew ê bi her awayî rê li ber bernameya çekên nukleerî ya Îranê bigirin.
/Nûçeyên Cîhanê/
