🔴Li rojhilatê Erebistana Siûdî, êrîşeke mezin birin ser kargeheke petrokîmyayê ya li bajarê Cubeylê. Piştî êrîşê û geşbûna rageşiyê, Pira Kral Fehd a ku Siûdî û Bahreynê girê dide, ji bo tedbîrê ji trafîkê re hat girtin.
NÛPEL – Şeva borî li bajarê Cubeylê yê Erebistana Siûdî, ku wekî yek ji navendên herî mezin ên pîşesaziyê ya cîhanê tê naskirin, teqînên dijwar pêş ketin. Li gorî agahiyên herêmî, êrîş birin ser kompleksa petrokîmyayê ya kompanyaya SABIC’ê û di encamê de li kargehan şewat derket.
18 Balafirên Bêmirov (İHA) Hatine Têkbirin
Wezareta Bergiriyê ya Erebistana Siûdî ragihand ku di saetên dawî de li esmanê welat 18 balafirên bêmirov (İHA) hatine dîtin û ji aliyê pergalên parastinê ve hatine rûxandin. Hat diyarkirin ku ev êrîş tenê çend saet piştî êrîşeke li ser navendên pîşesaziyê yên Îranê pêk hatiye, ku nîşan dide şerê li Rojhilata Navîn derbasî qonaxeke nû û xeternak bûye.
Pira Kral Fehd ji Trafîkê re Hat Girtin
Piştî geşedanên leşkerî, Rêveberiya Pira Kral Fehd daxuyaniyek belav kir. Di daxuyaniyê de hat gotin ku li ser hişyariya “Platforma Hişyariya Zû ya Neteweyî” ya herêma Şarkiyeyê, Pira Kral Fehd a 25 kîlometre dirêj, ji bo ewlehiyê bi awayekî demkî ji trafîkê re hat girtin.
Agahiyên Derbarê Êrîşên Moşekî
Wezareta Bergiriyê her wiha destnîşan kir ku li herêma Şarkiyeyê 11 moşekên balîstîk hatine astengkirin. Hat ragihandin ku perçeyên 7 moşekan li nêzîkî tesîsên enerjiyê ketine û xebatên tespîtkirina zirarê berdewam dikin.
Tê zanîn ku ji 28’ê Sibatê ve, Îran wekî bersivdayîna êrîşên DYA û Îsraîlê, li 7 welatên erebî baregehên Amerîkayê û xalên krîtîk dike hedef. Êrîşa li ser Cubeylê ku navenda hilberîna polat, benzîn û gubeya kîmyewî ye, wekî derbeke giran li binesaziya aborî ya herêmê tê nirxandin.
/Çavkanî: Rûdaw/
