🔴NÛPEL – Fermandarê Giştî yê Hêzên Sûriyeya Demokratîk (HSD) Mezlûm Ebdî, bi minasebeta sersala nû ya kildan, suryan û asûriyan, Cejna Ekîtoyê, peyameke pîrozbahiyê weşand. Ebdî di peyama xwe de bal kişand ser girîngiya biratiya gelan û parastina mîrata çandî ya herêmê.
Pîrozbahî Ji Bo Gelên Mezopotamyayê
Mezlûm Ebdî di peyama xwe de pîrozbahiyên xwe yên herî germ pêşkêşî gelê kildan, suryan, asûrî û hemû pêkhateyên herêmê kir. Ebdî destnîşan kir ku Cejna Ekîtoyê ne tenê rojeke olî an neteweyî ye, lê belê nîşaneya kûrahiya şaristaniya herêmê û nirxên nûbûn û hêviyê ye.
‘Mîrata Çandî bingeha Aramiyê ye’
Fermandarê Giştî yê HSDyê di nava peyama xwe de girîngiya parastina mîrata dîrokî ya gelên herêmê anî ziman û wiha got:
“Ekîto yekîtî û aramiyê xurttir dike. Parastina vê mîrata çandî û şaristaniyê ji bo xurtkirina pergala hevjiyana azad û aram erkeke bingehîn e.”
Hêviya Aşitî û Dadperweriyê
Ebdî di dawiya peyama xwe de hêvî kir ku ev cejn bibe wesîleya xêr, aştî û aramiyê. Her wiha tekez kir ku ew wek HSD piştgiriya xurtkirina nirxên biratî û bihevrejiyanê dikin da ku paşerojeke ewle û dadperwer ji bo hemû gelan bê avakirin.
Mezlûm Ebdî peyama xwe bi pîrozbahiyeke bi zimanê suryanî bi dawî kir: “Ekîto Brîxo!” (Cejna Ekîto pîroz be).
