🔴AMED (Nûpel)– Li gundê Emerka yê bi ser navçeya Farqîna Amedê ve, Şahiya Serhivde ya ku di nav gel de wekî “Şahiya Mirazan” jî tê naskirin, bi beşdariya bi sedan kesî dest pê kir. Şahiya ku sê rojan berdewam dike, îsal bi dîwana dengbêjan û pêşbirka hespên rewan rengîn bû.
Şahiyek ji Kûrahiya Dîrokê: Herêma Badikan
Li herêma Badikan ev bi sedan sal in ku her sal di navbera 27 û 29ê Adarê de Şahiya Serhivde tê lidarxistin. Şahiya îsal bi hevkariya Şaredariya Farqînê û Şaredariya Bajarê Mezin a Amedê hate organîzekirin. Hevşaredarên Farqînê Sevîm Bîçîcî û Kadrî Esen, ligel Seroka Daîreya Çandê ya Şaredariya Bajarê Mezin Zeynep Yaş û gelek welatî beşdarî şahiyê bûn.
Navenda Mirazan: Ziyareta Şêx Measê Cembelî
Yek ji taybetmendiyên herî girîng ên vê şahiyê, serdana gorê Şêx Measê Cembelî (Kurê Pîrê) ye. Welatiyên ku ji herêmên cuda tên, li ber gora Şêx Meas duayan dikin û “mirazên” xwe dixwazin. Ji ber vê yekê navê şahiyê di nav gel de wekî “Şahiya Mirazan” hatiye naskirin.
Dengbêj û Hespên Rewan: Vegera li Ser Kokan
Bernameya roja yekem bi dengê zelal ê dengbêjan dest pê kir. Di dîwana dengbêjan de kilam û qesîde hatin gotin û bîreweriya çandî hate vejandin. Piştî dîwanê, dildarên hespan derketin qadê. Di pêşbirka hespên rewan de siwaran şiyana xwe nîşan dan û welatiyan bi heyecaneke mezin li bezandina hespan temaşe kir. Di encama pêşbirkê de sê hespên herî serkeftî hatin diyarkirin.
Bazara Şahiyê û Aboriya Herêmê
Li qada şahiyê etarokan (firoşkarên gerok) standên xwe vegirtin. Ji xwarinên herêmî heta xişr û mişran (aksesuar) gelek tişt hatin firotan, ku vê yekê jî coş û tevgera şahiyê zêdetir kir.
Şahiya Serhivde dê heta 29ê Adarê bi çalakiyên cuda yên çandî û civakî berdewam bike.
/Çavkanî: AW/
