NÛPEL – Îro 22yê Nîsanê ye. Di ser weşandina yekemîn rojnameya Kurdî re 128 sal û di ser damezrandina Sendîkaya Rojnamegerên Kurdistanê re jî 28 sal derbas bûn. Gelê Kurd û xebatkarên ragihandinê vê roja dîrokî wekî “Roja Rojnamegeriya Kurdî” pîroz dikin.
Destpêka Serkêşiya Bedirxaniyan
Dîroka rojnamegeriya Kurdî, 128 sal berê di 22yê Nîsana 1898an de li paytexta Misirê, Qahîreyê dest pê kir. Rewşenbîrê Kurd Miqdad Mîdhed Bedirxan, tevî hemû zehmetiyan, yekemîn hejmara rojnameya “Kurdistan”ê derxist û bingeha çapemeniya neteweyî avêt.
Ji Qahîreyê Heta Ewropayê: Rêwîtiya 31 Hejmaran
Rojnameya Kurdistanê di dema weşana xwe de rastî zextên giran ên Dewleta Osmanî hat. Ji ber van zextan, cihê çapkirina rojnameyê gelek caran guherî:
Hejmarên 1-5: Li Qahîreyê ji aliyê Miqdad Mîdhed Bedirxan ve hatin derxistin.
Hejmarên 6-19: Li bajarê Cinêvê (Swîsre) ji aliyê birayê wî Ebdurrehman Bedirxan ve hatin weşandin.
Hejmarên 20-31: Rêwîtiya rojnameyê li London û careke din li Cinêvê berdewam kir.
Bi giştî 31 hejmarên rojnameya Kurdistanê hatin çapkirin û ev xebat bû ronahiyek ji bo kovar û rojnameyên piştî xwe.
Mîrateya ku Mezin Dibe
Piştî “Kurdistan”ê, bi dehan weşanên wekî Şerq û Kurdistan, Amîd-î Sevda, Rojî Kurd, Hetawî Kurd, Yekbûn û kovara Jînê cihê xwe di dîrokê de girtin. Di sala 1973yan de li Başûrê Kurdistanê, bi awayekî fermî biryar hat girtin ku 22yê Nîsanê wekî “Roja Rojnamegeriya Kurdî” bê pîrozkirin.
“Îro mîrateya ku Miqdad Mîdhed Bedirxan 128 sal berê li xerîbiyê dest pê kiribû, bi hezaran rojname, kovar, televîzyon û malperên nûçeyan li her çar perçeyên Kurdistanê û li seranserê cîhanê berdewam dike.”
