NAVENDA NÛÇEYAN (Nûpel) – Daxuyaniya Onursalê Koç Holdingê Rahmî Koç a ku di vekirina nexweşxaneyekê de li Îzmîrê dabû, rastî bertekan hat. Baroya Wanê ragihand ku ji ber gotinên Koç ên ku nasnameya Kurdî û jinan dikin hedef, ew ê serlêdana sûçê bikin.
Serokê Rûmetê yê Koç Holdingê Rahmî Koç, di merasîma vekirina Nexweşxaneya Amerîkî ya li Balçovaya Îzmîrê de, fîkrayek vegot. Koç di fîkraya xwe de îfadeyên mîna, “Bijîşk guh daye derdê jina Kurd. Gava gotiye ‘Xanim, li piştperdeyê cilên xwe biguhere û tazî bibe’, jinikê gotiye ‘Bijîşk beg, pêşî tu tazî bibe'” bikar anî. Ev gotinên Koç piştî ku li ser torên civakî belav bûn, rastî berteka gelek kesan hatin.
Daxuyaniya Baroyê
Baroya Wanê li ser vê mijarê daxuyaniyeke nivîskî weşand û destnîşan kir ku gotinên Rahmî Koç îfadeyên zayendperest in û nasnameya Kurdî û ya jinê jêrûbîr dikin. Di daxuyaniyê de hat destnîşankirin ku ev celeb gotin zirarê didin aştiya civakî, prensîba hemwelatiya wekhev û rûmeta mirovatî.
Di daxuyaniya baroyê de ev xal hatin diyarkirin:
“Gotên rûreşiyê yên ku li ser nasname, dîrok û hebûna civakî ya gelê Kurd tên hilberandin, nayên qebûlkirin. Her wiha, ji ber zayenda wan, piçûkxistin û tinazkirina bi jinan, an jî rûbirûhiştina wan bi gotinên ku wan di jiyana civakî de dixe asta duyemîn, bi tu awayî nayê pejirandin. Armancgirtina tu gelekî ji ber nasnameya wî ya etnîkî, yan jî tu kes û herêmeke civakî ji ber zayenda wan, bi nîzama civaka demokratîk û nirxên mafên mirovan re li hev nake.”
Baroya Wanê di dawiya daxuyaniya xwe de raya giştî agahdar kir ku ji bo nirxandina hiqûqî ya van îfadeyan û birêvebirina lêpirsîna pêwîst, ew ê serlêdana sûçê bikin. Hat destnîşankirin ku baro dê li dijî cudakarî û gotinên nefretê yên li ser bingeha etnîkî têkoşîna xwe bidomîne.
