🔴NÛPEL – Şêwirmendê medyayî yê Serokkomarê Îranê, Elî Esxer Şefiyan, derbarê hewildanên navbeynkariyê yên di navbera Tehran û Washingtonê de daxuyaniyên girîng da. Şefiyan destnîşan kir ku Pakistan ji bo çareserkirina aloziyên kûr ên navbera her du welatan ne xwedî bandoreke têra xwe ye û diyar kir ku Pakistan ji bo vê erkê “biçûk” ma.
“Çîn an Rûsya divê bikevin dewrê”
Şefiyan da zanîn ku tevî hevdîtinên li Îslamabadê encameke berçav nedane jî, hîn derfeta lihevkirinê heye. Lê belê, wî tekez kir ku ji bo encameke rasteqîn, divê di qonaxên bê de welatên wekî Çîn an Rûsya rola navbeynkariyê bigirin ser milê xwe. Li gorî Şefiyan, ev hêzên mezin dikarin daxwazên zêde yên her du aliyan di xalên navîn de bînin cem hev.
Mijarên sereke: Uranyum û Tengava Hurmizê
Di nava nûçeyê de hat diyarkirin ku di hevdîtinan de her aliyekî 10 heta 15 daxwaz pêşkêş kirine. Şêwirmendê Îranî bal kişand ser du astengiyên herî mezin:
Bernameya Nukleerî: Amerîka mijara dewlemendkirina uranyumê wekî “çarenivîssaz” dibîne.
Tengava Hurmizê: Îran naxwaze bi hêsanî dest ji vê karta xwe ya stratejîk û zextê berde.
Şefiyan got: “Ev rêyeke fireh e û divê em di dawiyê de li hev bikin, çimkî ne mimkin e ku ev der her tim girtî bimîne.”
‘Divê Libnan neyê jibîrkirin’
Yek ji xalên balkêş ên daxuyaniyê jî girêdayî rewşa Libnanê bû. Şefiyan ragihand ku ji bo Îranê ev mijareke “exlaqî” ye û divê Libnan jî bibe beşek ji danûstandinan, ji ber ku ew di serî de ji ber Îranê ketine nav vê pêvajoya şer.
Hişyariya Krîzê: Bawerî tune, garantî heye
Şêwirmendê Serokkomar hişyarî da ku eger rêkeftinek pêknehat, dê encamên wê ji bo Îran, Amerîka û tevahiya herêmê bibe metirsiyeke mezin. Wî bi bîr xist ku di polîtîkaya navneteweyî de “bawerî” tune ye, tenê tiştên ku tên îmzekirin û çavdêrîkirin girîng in.
/Çavkanî: Rûdaw/
