🔴NAVENDA NÛÇEYAN (Nûpel) – Li navçeya Sîwêregê ya Şanliurfayê, xwendekarekî 17 salî bi tivinga pompeyî êrîşî lîseya xwe kir. Di encama gulebarana bêserûber de, piraniya wan xwendekar 16 kes birîndar bûn. Hate îdîakirin ku êrîşkar hinek xwendekar wekî rehîn girtine.
Bûyer Çawa Pêk Hat?
Bûyer li Taxa Hasan Çelebî, di Lîseya Pîşeyî û Teknîkî ya Anadolu ya Ahmet Koyuncu de qewimî. Li gorî agahiyan, xwendekarekî ku berê bi hevalên xwe re nîqaş kiribû, bi tivingeke pompeyî hat dibistanê û dest bi gulebarankirina derdorê kir.
Rewşa Birîndaran û Mudaxeleya Ewlehiyê
Piştî agahdarkirinê, hejmareke zêde ya polîs, tîmên taybet û ambulans sewqî cihê bûyerê hatin kirin. Di êrîşê de 16 kes birîndar bûn û tîmên tenduristiyê dest bi dermankirina wan kirin. Polîsan dibistan dorpêç kir û ji bo ewlehiyê beşek zêde ya xwendekaran ji avahiyê derxistin.
Îdîaya Rehîngirtinê
Li gorî nûçeya ku ajansa ÎHA’yê belav kiriye, êrîşkarê ku hîn di hundirê dibistanê de ye, hinek xwendekar wek rehîn girtine. Hêzên ewlehiyê ji bo bêbandorkirina êrîşkar û rizgarkirina xwendekaran xebatên xwe didomînin. Tê gotin ku bang li êrîşkar hatiye kirin ku teslîm bibe.
Şahidê Bûyerê Diaxive
Şahidekî ku li cihê bûyerê bû, dema êrîşê wiha vegot:
“Êrîşkar ciwanekî 17-18 salî bû. Bi çekeke lûledirêj ket hewşa dibistanê. Berê li hewşê û paşê rasterast di hundirê dibistanê de bêserûber gule reşandin.”
