Li bajarên Darmstadt û Duisburgê yên Elmanyayê çalakiyên 1’ê Gulanê hatin lidarxistin. Bi sedan Kurdistanî û rêxistinên demokratîk û çep tevlî çalakiyan bûn.
Meşa li Darmstadtê ji Messeplatzê destpê kir û heta Marktplatzê ya li navenda bajêr dewam kir. Beşdar bi dirûşmên “Bijî 1’ê Gulanê” û “Em xwedî li mafên kedkaran derkevin” meşiyan. Di meşê de bi peyaman iştgigrî ji mafên karkeran re hate dayin.
Li Marktplatzê jî mîtîng hate lidarxistin û nûnerên sendîka û saziyan axivîn. Di axaftinan de hate ragihandin ku mercê jiyanê yê kedkaran li Ewropa û Elmanyayê giran bûye û karker neçar mane ku bi mûçeyên kêmtirîn debara xwe bikin.
Di çalakiyê de daxwaza sîstemeke garantiya civakî ya xurt û polîtîkayên mûçeyên adîl hate kirin.
Jinên Kurd jî di çalakiyê de bi rengê xwe amade bûn.
DUISBURG
Li bajarê Duisburgê 1’ê Gulanê Cejna Karker û Kedkaran bi meş û mîtînga bi beşdariya bi hezaran kesî hate pîrozkirin. Çalakiyê bi pêşengiya Yekîtiya Sendîkayên Elman (DGB) li ber girtîgeha li taxa Hambornê destpê kir.
Kurdistanî bi alên xwe tevlî mîtîngê bûn û nûnerê gelek saziyan axaftin kirin. Piştre meşek bi qasî 3 kîlometreyan pêk hat û bernameyê li Meidrich Landschaftparkê bi mîtîngê dewam kir.
Di mîtîngê de dirûşmên “Bijî 1’ê Gulanê”, “Bijî xwişk û biratiya gelan” û “Jin, Jiyan, Azadî” hatin qîrîn.
/Çawkani: ANF/
