🔴Li Tengava Babûl Mendebê ku dilê bazirganiya cîhanê ye, îdia tê kirin ku rageşiya leşkerî gihiştiye asta herî jor. Hêza Qudsê ya Îranê hişyariyeke neasayî da keştiyên li herêmê û hat gotin: “Ji her demê zêdetir baldar bin.”
NAVENDA NÛÇEYAN (Nûpel) — Li Tengava Babûl Mendebê ya ku di navbera Yemen û Cibûtî de cih digire û xala herî krîtîk a derbasbûna bazirganiya gerdûnî ye, îdiayên derbarê rageşiyeke nû ya leşkerî de bûn sedema fikarên navneteweyî. Li gorî agahiyên ku ji çapemeniya herêmî û navneteweyî hatine girtin, ji saetên nîvro û pê ve asta rîskê li herêmê bi awayekî cidî zêde bûye.
Hişyariya Ji Hêza Qudsê: “Li Şeş Aliyên Xwe Binêrin”
Ajansa Nûçeyan a Farsê, li ser zarê rayedarekî ku nexwestiye navê wî eşkere bibe, ragihand ku unsûrên girêdayî Hêza Qudsê ya Mihafizên Şoreşê hişyariyeke taybet daye keştiyên bazirganî û leşkerî yên li herêmê. Di peyama navborî de hat gotin: “Her kesê ku ji îro nîvro pê ve dixwaze ji Babûl Mendebê derbas bibe, divê ji her demê zêdetir bala xwe bide şeş aliyên xwe.”
Dilê Enerjiyê di Bin Metirsiyê de ye
Babûl Mendeb wekî deriyekî stratejîk ku Deryaya Sor di ser Kendava Adenê re bi Okyanûsa Hindî ve girêdide, tê naskirin. Ev tengav rêya sereke ya bazirganiya di navbera Ewropa û Asyayê de ye. Pispor destnîşan dikin ku rojane nêzîkî 5-6 mîlyon varîl neft di vê tengavê re derbas dibe. Her astengiyek an pevçûnek li vir, dikare rasterast bibe sedema lerizîna bazarên enerjiyê yên cîhanê.
Senaryoya “Krîza Du Alî”: Hürmüz û Babûl Mendeb
Tê gotin ku zêdebûna rageşiya navbera DY û Îranê ne tenê Tengava Hurmuzê, lê Babûl Mendebê jî kiriye hedefa rîskên ewlehiyê. Rayedarên Îranî beriya niha anîbûn ziman ku di senaryoyeke leşkerî de ew dikarin Babûl Mendebê jî mîna Hurmuzê bigirin.
Ger her du tengav di heman demê de bikevin bin rîskê, tê pêşbînîkirin ku:
Dabînkirina nefta cîhanê raweste.
Bihayên sotemeniyê bi awayekî astronomîk zêde bibin.
Keştiyên barhilgir neçar bimînin ku ji başûrê Afrîkayê re (Serê Hêviya Baş) herin, ku ev jî tê wateya zêdebûna mesrefên lojîstîk û derengketina kelûpelan.
Peyameke Rasterast ji Bo Trafîka Deryayî
Her çend hişyariya Hêza Qudsê gefeke rasterast a êrîşê nîn e jî, pispor vê wekî “pêşîgirtina bi çavtirsandinê” dinirxînin. Lêbelê, tevgera leşkerî ya li qadê nîşan dide ku dibe ku ev hişyarî bibe pêşenga geşedaneke nû ya li ser erdê.
