NÛPEL – Fermandarê Giştî yê Hêzên Sûriyeya Demokratîk (HSD) Mezlûm Ebdî, ji bo peydakirina piştgiriyên aborî û siyasî yên ji bo herêmên di bin kontrola xwe de, dest bi geşteke dîplomatîk a Ewropayê kir. Lê belê, agahiyên dawî nîşan didin ku plana wî ya ji bo hevdîtina bi Serokkomarê Fransayê Emmanuel Macron re, rastî astengiyên Washingtonê hatiye.
Geşta Ewropayê dest pê kir
Mezlûm Ebdî roja çarşemê gihîşt Îtalyayê û bi vî awayî qonaxa yekem a serdana xwe ya Ewropayê dest pê kir. Li gorî bernameyê, tê payîn ku Ebdî piştre serdana Holenda û Fransayê bike û li van welatan bi gelek dîplomat û berpirsên payebilind ên ewlehiyê re hevdîtinan pêk bîne.
“Washington naxwaze Şam aciz bibe”
Li gorî rapora taybet a malpera Al-Monitor, tevî ku Ebdî dixwaze hefteya bê li Parîsê bi Macron re rûne, rêveberiya Trump bi tundî li dijî vê hevdîtinê derdikeve.
Çavkaniyên ku agahî dane Al-Monitorê, sedema vê helwesta Amerîkayê bi ziyareta plankirî ya Macron a bo Şamê ve girê didin. Li gorî van çavkaniyan:
Tirs ji aloziya di navbera Parîs û Şamê re: Amerîka dixwaze pêwendiyên nû yên di navbera Fransa û Sûriyeyê de bi parastî bimînin.
Reaksiyona Ehmed Şer: Washington naxwaze Serokkomarê Sûriyeyê Ehmed Şer bi vê hevdîtinê aciz bibe.
Fikarên dîplomatîk: Çavkaniya Al-Manîtorê diyar kir ku dibe Şam hevdîtineke wiha wekî bilindkirina asta fermî ya Mezlûm Ebdî bihesibîne, ku ev yek jî dê bibe sedema kûrbûna aloziya navbera Şam û Parîsê.
