Li Enqereya paytexta Tirkiyeyê polîsan bi tundî midaxeleya çalakiya mamosteyên ku ji ber pergala mulaqatê (ezmûna devkî) mexdûr bûne û mamosteyên sektora taybet kir.
Polîsan rê neda mamosteyan ku li ber Parlamentoya Tirkiyeyê daxuyaniyê bidin û gelek kes desteser kirin.
Mamosteyan tevî êrişê jî bi paş de gav neavêt û çalakiya xwe li ser Cadeya Sakaryayê berdewam kir.
Binpêkirina mafên mamosteyan
Nêzîkî 1600 mamosteyên ku dibêjin ji ber pergala mulaqatê ya Wezareta Perwerdeyê mafê wan hatiye binpêkirin, tevî mamosteyên sektora taybet xwest dengê xwe bigihînin parlamentoyê.
Lê belê hêzên ewlehiyê midaxele kir û rê li ber wan girt.
Mamosteyên ku li ber Wezareta Perwerdeyê civiyan, xwest ber bi Deriyê Çankayayê yê Parlamentoya Tirkiyeyê ve bimeşin.
Dema kom gihîşt Guvenparkê, polîsan dora wan girt û rê li ber wan girt.
Di dema alozî û pevçûnê de, Serokê Giştî yê Sendîkaya Mamosteyên Sektora Taybet Eren Edebalî jî di nav de, gelek mamoste bi kelepçekirina ji paş ve hatin desteserkirin.
Çalakiya li Cadeya Sakaryayê
Piştî midaxeleya polîsan, mamosteyên ku li ber xwe da derbasî Cadeya Sakaryayê bûn û li wir dest bi xwenîşandanê kir.
Hat dîtin ku polîsan di dema êrişê de bi mertalên xwe rê li ber kamerayan girt ku kêliyên tundiyê neyên qeydkirin.
/Çawkani: Rûdaw/
