Dema çinînê nêzîk hatiye, dawiya gulanê ye, rengê genim zer dibe, cotkar û xwedî erd xwe ji bo xêr û bêra çandiniya îsal amade kirine.
Simbilên genim tije xuya dikin, îsal erd têrav in, baranê dilê cotkaran xweş kiribû, lê biryarên ku ji Şamê tên, nehiştin ew dilxweşî biçe serî.
Li Dirbêsiyê çalakiyek hat lidarxistin
Dengê nerazîbûnê bilind dibe, li dijî biryara herî dawî ya Hikûmeta Veguhêz a Sûriyê li bajarê Dirbêsiyê yê Cizîra Rojavayê Kurdistanê çalakiyek hat lidarxistin.
Beşdarên çalakiyê didin xuyakirin ku ev buhayê destnîşankirî nayê qebûlkirin.
Hikûmeta Veguhêz jî ji bo her kîloyek genim 4600 Lîreyên Sûrî weke buha destnîşan kiriye.
Daxwaz hat kirin ku buhayekî nû ji bo kirîna genim bê danîn
Di çalakiyê de daxwaz hat kirin ku buhayekî nû ji bo kirîna genim bê danîn û beşdarên çalakiyê dan zanîn ku ev biryar aboriya Sûriyê bi tevayî wêran dike.
Li ser pankartekê ku di çalakiyê de hatibû bilindkirin, ev hatiye nivîsandin: “Heger erd bimire, welat dimire.”
Berî vê çalakiyê, di rojên derbasbûyî de li çend bajarên din jî xwepêşandan hatibûn lidarxistin û di wan de daxwaz ji Hikûmeta Veguhêz a Sûriyê hatibû kirin ku vê biryarê betal bike, biryareke nû derxe û buhayê kirîna genim bilindtir bike.
/Çawkani: nucetv.net/
