AMED (Nûpel)– Amedspora ku derket Lîga Super, bi beşdariya deh hezaran alîgerên xwe li Parka Newrozê şampiyoniya xwe pîroz kir. Di pîrozbahiyê de peyama “Amedspor ji klûbekê bêtir e” derket pêş.
Amedspora ku di koka xwe de şampiyonî bi dest xist û derket Lîga Super, li Parka Newrozê ya Amedê bi merasîmeke bi heybet kupa xwe hilda. Bi sed hezaran kesên ku ji 7 salî heta 70 salî bi rengên kesk û sor li qadê amade bûn, serkeftina tîma xwe bi dirûşm û stranan pîroz kirin.
Di qada pîrozbahiyê de pankartên wekî “Em hatin”, “Onlar takım, sen kimliksin”, “Kendimize şampiyon olduk” û “Güneşin çocukları geliyor” hatin daliqandin.
Destpêka bi Govend û Kupaya Yekem
Bername bi performansa DJ Ramazan Karakaş dest pê kir û qada pîrozbahiyê veguherî qada govendê. Destpêkê, Tîma Basketbolê ya Bêasteng a Amedsporê ya ku derketibû Lîga Super, kupaya xwe bi destê Dayika Aşitiyê Nezahat Teke hilda. Piştre hunermend Beser Şahin bi stranên xwe coşa gel geş kir.
Nahit Eren: ‘Me ji Nasnameya Xwe Tawîz Neda’
Serokê Klûba Amedsporê Nahit Eren di axaftina xwe de bal kişand ser zehmetiyên ku dîtine û wiha got:
“Me ti carî baweriya xwe winda nekir. Ma em rastî êrîşan nehatin? Ma em nehatin daxistin? Belê, lê me tu carî ji nasnameya Amedsporê tawîz neda. Ziman û nasnameya Amedsporê aşitî, biratî û wekhevî ye.”
As-Seroka Klûbê Şeyda Arslantaş jî Roja Dayikan pîroz kir û destnîşan kir ku Amedspor bi nêrîna xwe ya azadîxwaziya jinê, di rêveberiya werzişê de pêşengiyê dike.
Kupa Di Nav Meşaleyan de Hat Bilindkirin
Piştî axaftinan, teknîk û lîstikvanên Amedsporê bi yek û yek hatin gazîkirin ser dikê. Futbolvan tevî malbat û dayikên xwe derketin pêşberî alîgeran. Kaptanê tîmê û lîstikvanan di nav çepik û fîskeyan de madalyayên xwe girtin. Kêliya ku kupa hat bilindkirin, bi dehan fîşekên hewayî û meşaleyan asîmanê Amedê ronî kir.
Peyama DTSO’yê: ‘Hêviya Gelekî Serket’
Serokê Odeya Bazirganî û Pîşesaziyê ya Amedê (DTSO) Mehmet Kaya jî diyar kir ku ev ne tenê serkeftina tîmekê ye û got: “Îro hêviya gelekî serket. Ev serkeftin wekî şîrê dê li we helal be.”
Bi Dronan li Ezmanan Nivîs Hat Nivîsandin
Yek ji kêliyên herî balkêş ên şevê jî nîşandana dronan bû. Bi dronan li ezmanên Amedê bi tîpên ronahî “Tima Gel”, “Em tên” û “Şampiyon Amedspor” hat nivîsandin.
Pîrozbahî bi konserên Koma Agirê Jiyan û koma Bajar bi gerandina govendên mezin bi dawî bû.
