NAVENDA NÛÇEYAN (Nûpel) – Serokê DYA’yê Donald Trump ragihand ku heke Îran mercên wan qebûl neke, dê bi hêzeke mezintir ji ya berê dest bi bombebarankirina vî welatî bikin.
Serokê Dewletên Yekbûyî yên Amerîkayê (DYA) Donald Trump, bi daxuyaniyên xwe yên dawî careke din bal kişand ser krîza li Rojhilata Navîn û bi tundî hişyarî da rayedarên Îranî. Trump destnîşan kir ku heke li ser mercên diyarkirî lihevkirin pêkneye, ew ê vebijêrka leşkerî bixin dewrê.
“Dê Bombebaran Bi Dijwarî Dest Pê Bike”
Trump li ser hesabê xwe yê medyaya civakî daxuyaniyek belav kir û diyar kir ku heke Îran mercan bipejirîne, operasyona ku wî wekî “Hêrsa Destanî” (Epic Fury) bi nav kiriye dê bi dawî bibe. Trump wiha got:
“Heke Îran mercên li ser hatine lihevkirin qebûl bike, wê ‘Hêrsa Destanî’ ya ku êdî bûye efsane bi dawî bibe. Ablukaya bandordar dê rê bide ku Tengava Hurmuzê ji bo her kesî, di nav de Îran jî, vekirî bimîne.”
Lê belê Trump di berdewamiya daxuyaniya xwe de gefên giran xwarin û got: “Heke qebûl nekin, dê bombebaran dest pê bike û mixabin ev ê li gorî ya berê di asteke pir bilindtir û dijwartir de be.”
“Projeya Azadiyê” Hatibû Rawestandin
Hêjayî bibîrxistinê ye ku Trump di 4ê Gulanê de ragihandibû ku ew ê alîkariya keştiyên welatên “bêalî” yên ku di Tengava Hurmuzê de asê mane bikin û navê vê yekê kiribû “Projeya Azadiyê”.
Wezîrê Karên Derve yê DYAyê Marco Rubio jî beriya niha dabû zanîn ku ji ber girtina tengavê ji aliyê Îranê ve, nêzîkî 23 hezar sivîlên ji 87 welatên cuda asê mane û armanca operasyonê rizgarkirina wan e. Lê belê, Trump di biryara xwe ya dawî de ragihand ku wan “Projeya Azadiyê” ji bo demekê daye sekinandin, ku ev wekî zexteke zêde ya li ser Tehranê tê nirxandin.
Rewşa Tengava Hurmuzê
Tengava Hurmuzê ku ji bo bazirganiya neftê ya cîhanê xaleke stratejîk e, niha di navenda vê rageşiyê de ye. Daxuyaniyên Trump nîşan didin ku Washington amade ye ji bo kontrolkirina vê herêmê hêza leşkerî ya herî giran bi kar bîne.
