🔴NÛPEL – Parêzgeha Dihokê ku wekî “şademara aboriya Herêma Kurdistanê” tê naskirin, îro bi nakokiyeke kûr re rû bi rû ye. Tevî ku bajêr xwedî çavkaniyên dewlemend ên petrolê û deriyekî sînorî yê stratejîk e, dîmenên bi sedan welatiyên ku ji bo alîkariyê ketine rêzê, kûrahiya qeyrana aborî û civakî radixe ber çavan.
Rêzên Dirêj ên Ji Bo Alîkariyê
Li gorî dîmenên ku ji aliyê ajansa Rojnewsê ve hatine belavkirin, bi hezaran welatiyên Dihokî li ber deriyê Rêveberiya Tora Parastina Civakî kombûne. Sedema vê qerebalixiyê, projeyeke hevpar a Hikûmeta Hollanda û Banka Cîhanî ye. Di çarçoveya vê projeyê de biryar hat girtin ku alîkarî bidin 2 hezar û 200 malbatên hejar.
Ev alîkariya ku mîktara wê di navbera 125 hezar û 325 hezar dînarê Iraqî de ye û dê salekê berdewam bike, her çiqas kêm be jî, ji bo malbatên ku nikarin pêdiviyên xwe yên seretayî dabîn bikin, bûye hêviyek.
Di Navbera Du Cemsereyan de Dihok
Welatiyên ku ji bo navê xwe qeyd bikin di rêzê de bûn, nerazîbûna xwe li hemberî rêveberiya herêmê anîn ziman. Welatiyekî ku nexwest navê wî were eşkere kirin, rewşa civakê wiha pênase kir:
“Civak bûye du cemserên dijber; komeke biçûk ku bi rêya desthilatê li ser nanê welatiyan dewlemend dibin û gelê ku di bin xeta hejariyê de ji bo mayînê têdikoşe. Dahata petrolê li şûna xizmetguzariyê, tenê di navbera komek berpirs û zarokên wan de tê dabeşkirin.”
Daneyên Fermî: Dihok di Hejariyê de ya Yekem e
Li gorî daneyên dawî yên Wezareta Plandanînê ya Iraqê, parêzgeha Dihokê di asta Iraq û Herêma Kurdistanê de di rêjeya bêkarî û hejariyê de di pileya yekem de cih digire:
Rêjeya Bêkariyê: %17,5
Rêjeya Hejariyê: %14,8
Şademara Aboriyê ya ku Gelê wê Birçî ye
Dihok xwedî bîrên petrolê yên girîng ên wekî Tawk û Şêxan e. Her wiha Deriyê Sînorî yê Navneteweyî yê Îbrahîm Xelîl ku dahateke mezin a gumrukê tîne, li vê parêzgehê ye. Pispor û welatî balê dikşînin ser “sîstema neadilane ya dabeşkirina saman” û diyar dikin ku ev dewlemendî nakeve xizmeta xelkê herêmê, berevajî vê yekê xelkê Dihokê baca qeyran û bêkariyê dide.
