🔴NÛPEL – Di Koma 2yemîn a Lîga 3yemîn a TFFyê de, lîder 12 Bîngolspor li derveyî malê bû mêvanê Nîgde Belediyesporê. Tîma kesk û spî bi gola Osman Şahin a di deqîqeya 13an de 1-0 bi ser ket û 3 puanên gelek krîtîk bi dest xistin. Bi vê encamê re, tenê 3 hefte beriya bidawîkirina sezonê, ji bo şampiyoniyê tenê 1 puan ji 12 Bîngolsporê re bes e.
Gola Serkeftinê di Deqîqeya 13an de Hat
Pêşbirka ku li Stadyuma 5ê Sibatê ya Nîgdeyê hat lîstin, bi tempoyeke bilind dest pê kir. Di deqîqeya 13an de, Berkcan Aytaç ji baskê rastê top şand nav qada cezayê û Osman Şahin bi lêdaneke di cih de top şand nava tora dijber. Yarî bi vê golê 1-0 bi dawî bû û 12 Bîngolspor bi serkeftineke girîng vegeriya malê.
Ji bo Şampiyoniyê Tenê 1 Puan Ma
12 Bîngolsporê bi vê serkeftinê puanê xwe derxist 53yan. Di dema ku reqîbê wê yê herî nêz Silifke Belediyespor di 44 puanan de ma, ferqa puanan bû 9. Di rewşa heyî de, eger tîma kesk û spî di 3 maçên mayî de tenê 1 puanê bi dest bixe, dê şampiyoniya xwe ragihîne.
Kelacana Şampiyoniyê li Bîngolê
Tîma lîder dê di 5ê Nîsanê de li bajarê Bîngolê derkeve pêşberî alîgirên xwe. Di vê maçê de eger 1 puanê bigire an jî Silifke Belediyespor puanan winda bike, 12 Bîngolspor dê bi fermî şampiyoniya xwe li qada xwe pîroz bike.
