🔴NÛPEL– Hevserokên Giştî yên Partiya Gelan a Wekhevî û Demokrasiyê (DEM Partî), Tulay Hatîmogullari û Tuncer Bakirhan, têkildarî êrişên dawî yên li ser Herêma Kurdistanê daxuyaniyek dan û êrişa li ser mala Serokê Herêma Kurdistanê Nêçîrvan Barzanî şermezar kirin.
“Em Êrişên Hêzên Girêdayî Îranê Şermezar Dikin”
Hevserokên DEM Partiyê di daxuyaniya xwe de bal kişandin ser êrişên ku îro li parêzgehên Dihok û Hewlêrê pêk hatine. Hatîmogullari û Bakirhan diyar kirin ku ew van êrişên ji aliyê hêzên girêdayî Îranê ve hatine kirin bi tundî şermezar dikin û wiha gotin:
“Em bombebarankirina mala Rêzdar Nêçîrvan Barzanî şermezar dikin û silametiyê ji Birêvebiriya Herêma Kurdistanê re dixwazin.”
Bang li Îranê Hat Kirin: “Demildest Daxuyaniyê Bidin”
Di daxuyaniyê de hat bibîrxistin ku rêveberiya Îranê êrişên berê yên li ser Hewlêrê wekî “xeletî” pênase kiribûn. Hevserokan bang li Tehranê kirin ku derbarê êrişên îro de jî zelaliyekê bide û gavên pêwîst bavêje:
Divê rêveberiya Îranê demildest daxuyaniyekê bide.
Pêwîst e kesên berpirsiyar werin tespîtkirin û cezayên pêwîst werin sepandin.
“Dixwazin Şer li Herêmê Belav Bikin”
DEM Partiyê destnîşan kir ku Herêma Kurdistanê bi bedêlên giran gihîştiye statûya xwe ya îro û hişyarî da ku armanca van êrişan berfirehkirina qada şer e. Hevserokan di dawiya daxuyaniya xwe de peyama piştgiriyê da û gotin:
“Li hemberî vê zîhniyeta ku hewl dide cografyaya Kurdistanê bikişîne nav şer, em ê wekî duh îro jî di nava piştgiriyê de bin û têkoşîna xwe bidomînin.”
