🔴AMED (Nûpel) – Hevserokên MED TUHAD-FED’ê ragihandin ku wan ji bo hevdîtina bi Abdullah Ocalan re serlêdaneke fermî pêşkêşî Wezareta Dadê kirine û bal kişandin ser binpêkirinên mafan ên li girtîgehan.
Federasyona Komeleyên Hiqûqî û Piştevaniya bi Malbatên Girtî û Hikûmxwaran re (MED TUHAD-FED), têkildarî geşedanên dawî yên li girtîgehan û “Pêvajoya Civaka Demokratîk û Aştiyê” li avahiya xwe ya li Amedê civîneke çapemeniyê li dar xist.
‘Girtîgeh Lingê Herî Girîng ê Pêvajoyê ne’
Hevserokê Federasyonê Kerem Canpolat di civînê de diyar kir ku tevî axaftinên li ser pêvajoyê jî, li girtîgehan binpêkirinên mafan her ku diçe zêde dibin. Canpolat anî ziman ku ev rewş gumanan di nava civakê de çêdike û wiha got:
“Em dizanin ku lingê herî girîng ê vê pêvajoyê girtîgeh in. Heta ku şert û mercên li Îmraliyê neyên guhertin, li girtîgehên din jî guhertin çênabe. Divê Abdullah Ocalan bêyî navbeynkar peyamên xwe bigihîne civakê.”
Canpolat her wiha destnîşan kir ku înfaza girtiyên ku cezayê wan qediya ye bi hincetên keyfî tê şewitandin û bang li dewletê kir ku ji bo azadiya girtiyan gavên berbiçav biavêje.
Ji Bo Hevdîtinê Serlêdana Fermî
Hevseroka MED TUHAD-FED’ê Pınar Sakik Tekin jî aşkere kir ku wan wek federasyon, ji bo bi Abdullah Ocalan re rû bi rû hevdîtinê bikin û dengê wî bibîstîn, serî li Wezareta Dadê dane. Tekin diyar kir ku pêvajoya bi banga Öcalan dest pê kiriye hemû Rojhilata Navîn û cîhanê eleqedar dike, lê ev ruh hîna li girtîgehan xuya nake.
Rewşa Girtiyên Nexweş: ‘Mehmet Edip Taşar Jiyana Xwe Ji Dest Da’
Tekin bal kişand ser mirina girtiyê nexweş Mehmet Edip Taşar ê ku di 24’ê Adarê de jiyana xwe ji dest dabû û rewşa girtiyên wek Mehmet Emin Çam û Fikri Tugluk bi bîr xist. Tekin rexne li Saziya Tipa Edlî (ATK) û Lijneyên Çavdêriyê girt û got:
Nêzîkatiyên Keyfî: ATK bi biryarên xwe yên alîgir dibe sedema mirina girtiyan.
Bangawazî: Ji bo ku mirov behsa aştiyê bike, divê pêşî tecrîd bi dawî bibe, azadiya fîzîkî ya Abdullah Ocalan pêk were û girtiyên nexweş demildest bên berdan.
Di dawiya civînê de hat destnîşankirin ku heta li girtîgehan edalet pêk neyê, li tu derê civakê edalet bi cih nabe.
