🔴NAVENDA NÛÇEYAN – Li navçeyên Midyad û Nisêbînê yên Mêrdînê, ji ber barana zêde ya ku li herêmê bibandor e, du avahî hilweşiyan. Li Midyadê dayîkek û du zarokên wê ji bin xirbeyan hatin derxistin.
Li Bakurê Kurdistanê ev demeke baraneke zêde dibare û li gelek deveran bûye sedema lehiyê. Bandora vê hewaya xirab li Mêrdînê jî xwe nîşan da û di encamê de li du navçeyan bûyerên hilweşînê pêk hatin.
Li Midyadê Malbatek ji Bin Xirbeyan Hat Rizgarkirin
Li navçeya Midyadê, avahiyek ji ber barana zêde nekarî li ber xwe bide û hilweşiya. Di dema bûyerê de dayîkek û du zarokên wê di xew de bûn û di bin xirbeyan de man. Li ser agahdarkirinê, tîmên agirkujî û tenduristiyê tavilê sewqî cihê bûyerê hatin kirin. Di encama xebatên lêgerîn û rizgarkirinê de, dayîk û her du zarokên wê bi saxî hatin rizgarkirin û ji bo dermankirinê hatin rakirin nexweşxaneyê.
Li Nisêbînê Maleke Vala Hilweşiya
Bûyereke din a hilweşînê jî li navçeya Nisêbînê, li Taxa Selahattîn Eyyubî pêk hat. Li vir banê xaniyekî ji ber baranê bi ser de herifî. Li gorî agahiyên hatin bidestxistin, di dema bûyerê de kes di malê de nebûye, lewma di vê bûyerê de kuştî an jî birîndar nîn in, lê zirareke mezin a madî çêbûye.
