🔴Nûpel – Daîreya Medya û Zanyariyan a Hikûmeta Herêma Kurdistanê, bi daxuyaniyeke tund 5 rênimayên nû û “hişyariya dawî” arasteyî hemû dezgehên ragihandinê yên navxweyî û biyanî kir. Hikûmetê hişyarî da ku her binpêkirinek dikare bibe sedema girtina herdemî ya dezgehan.
Parastina Asayîşa Niştimanî di Ser Her Tiştî Re Ye
Daîreyê amaje bi rewşa “hestiyar” a Herêma Kurdistanê û navçeyê kir û diyar kir ku ev biryar ji bo parastina asayîşa niştimanî û aramiya herêmê hatine girtin. Li gorî daxuyaniyê, nîşandana hinek dîmenan rasterast xizmetê ji dijminan re dike û zanyariyên teknîkî yên hestiyar eşkere dike.
5 Rênimayên Serke: Çi Hatine Qedexekirin?
Hikûmetê rênimayên xwe di 5 xalên sereke de rêz kirine:
Sira Leşkerî: Belavkirina her cure zanyarî û nihêniyên leşkerî ku ziyanê bide asayîşê bi her awayî qedexe ye.
Dîmenên Dronan: Wênegirtin û belavkirina dîmenên têkşikandina dronan a li asman û nîşandana paşmayên (parçeyên) wan qedexe ye.
Cihên Armancgirtî: Nîşandana cihên ku bûne armanc û wênegirtina dezgehên serwerî û emnî (yekser piştî rûdanan) nayê qebûlkirin.
Lêpirsîna Dije Terorê: Dezgehên ku bi şêweyekî nepîşeyî rûmala nûçeyên şer bikin, dê rasterast ji aliyê Dije Terora Kurdistanê ve rûbirûyî lêpirsînê bibin.
Cezayên Tund: Li dijî serpêçkaran dê rêkarên îdarî werin girtin; ev yek dikare bigihîje betalkirina moleta karkirinê an daxistina hertimî ya dezgehê.
Nîşe: Ev biryar li gorî daxuyaniya Encumena Asayîşa Herêma Kurdistanê ya di dîroka 13ê Adara 2026an de hatiye dayîn, dikeve meriyetê.
Banga Ji Bo Medyakaran
Hikûmeta Herêma Kurdistanê daxwaz ji hemû rojnamevan û medyakaran kir ku berjewendiyên bilind ên niştimanî li ber çavan bigirin û di rûmalkirina bûyeran de bi berpirsyariyeke mezin tevbigerin.
/Çavkanî: Rûdaw/
