NÛPEL – Fermandariya Giştî ya Yekîneyên Parastina Jinê (YPJ) ragihand ku ji bo bidestxistina statuyeke yasayî û destûrî ya hêzên wan, li ser asteke bilind danûstandinên wan bi hikûmeta Şamê û rayedarên Amerîkayê re didomin.
Fermandariya YPJ’ê hişyarî da ku paşguhkirina rola jinan a di saziyên ewlehî û leşkerî de, ji bo paşeroja Sûriyeyê metirsiyeke mezin e.
Panel û nîqaşên li ser paşeroja Sûriyeyê
Ev agahî di paneleke bi rêya Zoomê ya Enstîtuya Aştiyê ya Kurdî de hatin eşkerekirin. Di panelê de entegrasyona hêzên leşkerî li Sûriyeyê, naskirina fermî ya YPJ’ê û rewşa jinan a di paşeroja Sûriyeyê de hatin nîqaşkirin. Fermandara Giştî ya YPJ’ê Rohilat Efrîn û Berdevka YPJ’ê Rûksen Mihemed beşdarî panelê bûn û bersiva pirsên beşdaran dan.
Şam û Washingtonê pêşniyara “Asayîşê” dikin
Di hevdîtinên dîplomatîk de, mijara sereke ya nîqaşan “modeleke guncav ji bo entegrasyona hêzan a di nav pêvajoya siyasî ya Sûriyeyê de” bû. Li gorî agahiyên ku Fermandara Giştî ya YPJ’ê Rohilat Efrîn da, hem hikûmeta Şamê û hem jî rayedarên Amerîkî, derbarê paşeroja YPJ’ê de pêşniyareke hevpar anîne ser masê.
Her du alî jî pêşniyar dikin ku YPJ di çarçoveya Hêzên Ewlehiya Hundirîn (Asayîş) de cih bigire.
“Em dixwazin taybetmendiya xwe biparêzin”
Rohilat Efrînê da zanîn ku wan di hevdîtina xwe ya dawî ya li Şamê de daxwazên xwe bi zelalî anîne ziman. Efrînê li ser vê mijarê wiha got:
“Em dixwazin li herêmên xwe taybetmendiya xwe biparêzin. Ev yek dê bibe garantiyek ji bo hemû jinan.”
Hevdîtina bi nûnerên Amerîkayê re
Rohilat Efrînê her wiha eşkere kir ku wan hefteya borî bi tîma Nûnerê Taybet ê Serokê Amerîkayê yê Kar û Barên Îraq û Sûriyeyê Tom Barrack re jî hevdîtinek pêk aniye. Di vê hevdîtinê de jî tîma Amerîkî heman pêşniyara tevlîbûna nava Hêzên Ewlehiya Hundirîn dubare kiriye.
Fermandariya YPJ’ê tekez kir ku tevî hemû pêşniyaran, ew hîn jî li ser bidestxistina zemîneke yasayî û destûrî ya xurt a ku hebûna wan û mafên jinan biparêze, di nava danûstandinan de ne.
Çavkanî: Rûdaw
