NÛPEL – Serokê Amerîkayê Donald Trump ragihand ku pêvajoya danûstandinên dîplomatîk a di navbera Amerîka û Îranê de bi awayekî birêkûpêk û avaker berdewam dike. Trump aşkere kir ku wî ji nûnerên xwe re gotiye ku ji bo peymanê lezê nekin, ji ber ku dem di berjewendiya Amerîkayê de ye.
Serokê Amerîkayê li ser hesabê xwe yê medyaya civakî daxuyaniyek belav kir û bal kişand ser hûrgiliyên peymana ku niha li ser tê axaftin. Trump destnîşan kir ku ev peyman dê bi awayekî teqez rê li ber Îranê bigire ku bibe xwediyê çekên nukleer û got, “Çekên nukleer dê werin qedexekirin.”
Dorpêça Deryayî Dê Berdewam Bike
Trump diyar kir ku heta peymaneke fermî û dawî neyê îmzekirin, dorpêça deryayî ya Amerîkayê ya li ser bendergehên Îranê dê berdewam bike. Serokê Amerîkayê bang li her du aliyan kir ku bi baldarî tevbigerin:
“Divê her du alî jî lezê nekin û karê xwe rast bikin. Divê ti xeletî neyên kirin.”
Trump her wiha anî zimên ku pêwendiyên niha yên bi Îranê re “gelekî profesyoneltir” û “berhemder” in, lê belê divê rayedarên Îranê fêhm bikin ku Washington bi tu awayî rê nade çêkirina çekên nukleer.
“Dibe ku Îran jî Tevlî Peymanên Îbrahîm Bibe”
Donald Trump ji bo hewldanên dîplomasiyê spasiya welatên herêmê kir û destnîşan kir ku di demeke nêz de dibe ku hinek welatên din jî tevlî “Peymanên Îbrahîm” bibin. Trump derbarê Îranê de jî îhtimaleke balkêş anî zimên û got, “Kî dizane, belkî Komara Îslamî ya Îranê jî bixwaze tevlî vê peymanê bibe.”
Serokê Amerîkayê daxuyand ku wan li ser peymaneke “bi qebareyeke mezin” danûstandin kirine û hûrgiliyên dawî yên peymanê niha tên nîqaşkirin, ku dê di demeke nêzîk de ji bo raya giştî werin ragihandin.
