NAVENDA NÛÇEYAN (Nûpel) – Hat ragihandin ku hêzên deryayî yên Îranê li Tengava Hurmuzê êrîşî 3 keştiyên şer ên Dewletên Yekbûyî yên Amerîkayê (DYA) kirine. Serokê DYAyê Donald Trump got: “Zirar negihîşt her sê keştiyên me yên destroyer, lê zirareke mezin gihîşt êrîşkarên Îranî. Ew bi temamî hatin tunekirin û tevî gelek keştiyên piçûk ên ku ji bo şûna donanmaya wan a îmhakirî hatibûn bikaranîn, di deryayê de hatin binaxkirin.”
Li gorî nûçeya ku li ser bingeha çavkaniyekî nenas ji Ajansa Nûçeyan a Tesnimê re axiviye, di êrîşê de zirar gihîştiye keştiyên şer ên DYAyê. Hat diyarkirin ku êrîşa navborî bi fûze û dronên kamîkazê hatine kirin. Her wiha hat tomarkirin ku destroyerên donanmaya DYAyê piştî êrîşê ber bi Deryaya Omanê ve paşve vekişiyane.
Artêşa Îranê: DYAyê agirbest binpê kir û tankereke petrolê ya Îranê kir armanc
Berdevkê Biryargeha Navendî ya Hatemul Enbiya ya Hêzên Çekdar ên Îranê Îbrahîm Zulfîkarî diyar kir ku artêşa DYAyê agirbest binpê kiriye û êrîşî tankereke petrolê ya Îranê kiriye.
Trump: Her sê destroyer bêzerar in, lê derbeyek giran li êrîşkaran hat xistin
Serokê DYAyê Donald Trump li ser hesabê xwe yê medyaya civakî, derbarê daxuyaniya Fermandariya Navendî ya DYAyê (CENTCOM) ya li ser êrîşa li Tengava Hormuzê de peyamek parve kir. Trump diyar kir ku sê destroyerên artêşa DYAyê “di bin gulebaranê de bi serkeftî” di Tengava Hormuzê re derbas bûne û wiha dewam kir:
“Zirar negihîşt her sê keştiyên destroyer, lê zirareke mezin gihîşt êrîşkarên Îranî. Ew bi temamî hatin tunekirin û tevî gelek keştiyên piçûk ên ku ji bo şûna donanmaya wan a îmhakirî hatibûn bikaranîn, di deryayê de hatin binaxkirin.”
Trump îdia kir ku li dijî destroyerên DYAyê êrîşên fûze û drayên bêmirov pêk hatine, lê ew “bi hêsanî hatine xistin”. Trump parast ku Îran ji aliyê “dînan” ve tê birêvebirin û got: “Heke şansê wan ê bikaranîna çekên nukleerî heba, wan ê bê dudilî bikar bîna; lê ew ê tu carî negihîjin fersendeke wusa. Mîna ku me îro careke din ew têk birin, heke peymanên xwe zû îmze nekin, em ê di pêşerojê de wan hîn tundtir û dijwartir têk bibin.”
Artêşa DYAyê êrîşî benderên Keşm û Bender Abbas kir
Kanala Fox News a Amerîkayê, li ser bingeha rayedarekî pilebilind ê DYAyê îdia kir ku artêşa Amerîkayê li dijî Îranê êrîşên hewayî pêk aniye. Di nûçeyê de hat gotin ku artêşa DYAyê êrîşî Bendera Keşm û Bender Abbas a Îranê kiriye, lê hat destnîşankirin ku ev nayê wateya “destpêkirina şer” an jî “bidayîna agirbestê”. Derbarê van êrîşan de hîn daxuyaniyeke fermî ji Qesra Spî yan jî Pentagonê nehatiye dayîn.
Li Tehranê sîstemên parastina hewayî ketin dewrê
Li Tehranê, paytexta Îranê, sîstemên parastina hewayî hatin xebitandin. Li herêma rojavayê bajêr hat dîtin ku sîstema parastinê çalak e. Ajansa fermî ya Îranê IRNA ragihand ku sîstemên parastina hewayî li asmanê Tehranê li dijî muhîmatên ku ji aliyê “unsûrên dijmin” ve hatine avêtin, bersiv dane.
