🔴Li paytexta Îranê Tehranê teqînên dijwar berdewam dikin. Medyaya Îsraîlê ragihand ku di êrişan de rasterast serkirdeyên payebilind ên Îranê hatine hedefgirtin û operasyon bi hevkariya Amerîkayê tê birêvebirin.
Li gorî agahiyên ku ji herêmê û medyaya navneteweyî tên, li paytexta Îranê Tehranê dengê teqînên nû tê bihîstin. Di demekê de ku rageşiya di navbera Îsraîl û Îranê de gihîştiye asta herî bilind, hûrgiliyên operasyona “rêlibergirtinê” ya Îsraîlê derdikevin holê.
Malên Serkirdeyan û Tesîsên Serokomariyê di Hedefê de ne
Li gorî nûçeya Kanal 12 a Îsraîlê, hedefên êrişê ne tenê navendên leşkerî yan jî nukleerî ne. Hat îdîakirin ku artêşa Îsraîlê malên serkirdeyên payebilind ên Îranê, tesîsên serokomariyê û navendên fermandariyê hedef girtine. Her wiha hat diyarkirin ku ji bo şikandina hêza bersivdanê ya Îranê, cihên avêtina mûşekan jî bi giranî hatine bombebarankirin.
Operasyoneke Hevpar a bi Mehan: Îsraîl-Amerîka
Hate eşkerekirin ku ev êriş ne biryareke ji nişka ve ye, belku encama plansaziyeke hûr û kûr a bi mehan e. Rayedarekî payebilind ê parastinê ji Kanal 13 a Îsraîlê re axivî û got:
“Ev operasyoneke hevpar e ku berhema xebateke bi hûrgilî ya çend mehî ya Îsraîl û Amerîkayê ye. Her gav bi koordînasyoneke tam a bi Washingtonê re tê avêtin.”
“Koordînasyona Tam bi Washingtonê re”
Çavkaniyên leşkerî destnîşan dikin ku artêşa Amerîkayê di warê îstîxbarat û lojîstîk de piştgiriyeke aktîf dide vê operasyonê. Tê diyarkirin ku armanca bingehîn a vê “êrişa rêlibergirtinê” ew e ku kapasîteya Îranê ya êrişkirina ser Îsraîlê bi tevahî were lawazkirin.
Heta niha ji aliyê rayedarên fermî yên Îranê ve derbarê windahiyên canî û kîjan rayedar hatine hedefgirtin de daxuyaniyeke berfireh nehatiye dayîn.
