🔴NÛPEL – Piştî daxuyaniyên tund ên namzedê serokatiya Amerîkayê Donald Trump ên derbarê vekişîna ji NATOyê de, Yekîtiya Ewropayê (YE) helwesta xwe zelal kir. Komîsyona Yekîtiya Ewropayê ragihand ku ew bi biryar in pêwendiyên xwe yên bi NATO û Amerîkayê re biparêzin û veberhênanên xwe yên berevaniyê zêde bikin.
YE: NATO Stûna Sereke Ya Ewlehiya Me ye
Berdevka Komîsyona Yekîtiya Ewropayê Anitta Hipper, di civîna çapemeniyê ya li Brukselê de bersiv da nîqaşên li ser paşeroja NATOyê. Hipperê her çiqas rasterast li ser navê NATOyê neaxivî be jî, girîngiya hevpeymaniya di navbera Ewropa û Amerîkayê de bi van gotinan anî ziman:
“Eşkere ye ku em pêbendî pêwendiyeke bihêz a Transatlantîk in ku ji bo ewlehiya me gelekî girîng e. Em bi hev re her tim bihêztir in û ji bo vê yekê jî NATO xwedî girîngiyeke sereke ye.”
Hipperê her wiha destnîşan kir ku welatên Ewropayê êdî bêtir girîngiyê didin parastina xwe û got: “Em bi biryar in ku veberhênanê di ewlehî û parastina xwe de bikin.”
Trump: “NATO Pilingekî Kaxezî ye”
Sedema vê berteka YE’yê, daxuyaniyên dawî yên Serokê berê yê Amerîkayê Donald Trump bûn. Trump di hevpeyvînekê de bi rojnameya The Telegraph a Brîtanyayê re, careke din îhtimala derketina Amerîkayê ji NATOyê anî ziman.
Trump di daxuyaniya xwe de NATO bi tundî rexne kir û got:
“Ez cidî li ser derketina ji NATOyê difikirim.”
“Min her tim dizanibû ku ew (NATO) pilingên kaxezî ne.”
“Di vê navberê de, Putin jî vê rastiyê dizane.”
Paşeroja NATOyê di bin Sîya Hilbijartinan de
Nîqaşên li ser paşeroja NATOyê bi nêzîkbûna hilbijartinên Amerîkayê re germtir dibin. Analîst diyar dikin ku vekişîna Amerîkayê ji NATOyê dikare bibe sedema guherînekî radîkal di pergala ewlehiya cîhanê de. Ji ber vê yekê, welatên Yekîtiya Ewropayê hewl didin hem peymana Transatlantîk biparêzin hem jî kapasîteya xwe ya leşkerî ya serbixwe bêtir pêş bixin.
/Çavkanî: Rûdaw/
