🔴Serokwekîlê Koma DEM Partiyê Sezaî Temellî bang li Meclîsê kir ku li şûna “qanûnên torbayê”, ji bo çareserkirina pirsgirêkên bingehîn ên civakê û girtiyên siyasî demildest “qanûnên taybet” derxîne.
ENQERE (Nûpel) – Serokwekîlê Koma DEM Partiyê Sezaî Temellî, li Meclîsê civîneke çapemeniyê li dar xist û geşedanên di rojevê de nirxandin. Temellî bal kişand ser wê yekê ku Meclîs bi rojevên dûrî bendewariyên civakê re mijûl dibe û hişyarî da ku derengketina gavên qanûnî baweriya gel a bi pêvajoyê dişikîne.
‘Meclîs bi Qanûnên Torbayê Gel Mijûl Dike’
Temellî diyar kir ku desthilat bi qanûnên torbayê hewl dide krîzên heyî veşêre û wiha got: “Meclîs li dûrî bendewariyên gel dixebite. Sepana qeyiman berdewam dike, peywîra şeredariyan tê sînorkirin û girtin û binçavkirin ranewestiyan e.”
Parastina Mafê Jiyanê yê Ajalan û Daristanan
Temellî her wiha bal kişand ser qanûnên nû yên derbarê nêçîrvaniyê û daristanan de û destnîşan kir ku ev qanûn dê rê li ber kuştina ajalan û tunekirina xwezayê vekin:
Nêçîrvanî: “Welat ber bi Teksasê ve diçe, niha jî pêşiya kuştina ajalan vedikin.”
Krîza Avhewayê: “Tunekirina daristanan krîza avhewayê kûrtir dike, em van qanûnan qebûl nakin.”
‘Girtî û Civak li Benda Gavên Qanûnî ne’
Derbarê Pakêta Darazê û girtiyên siyasî de, Temellî destnîşan kir ku civak ji bo çareseriya demokratîk a Pirsgirêka Kurd li benda gavên konkret e:
“Hem girtiyên siyasî hem jî yên edlî li bende sererastkirineke adil in. Akademîsyenên ji kar hatine derxistin, qeyim û gelek mijarên din li bende qanûnên taybet in. Her ku derengî bikeve, baweriya gel dişkê.”
Krîza Aborî û Bandora Şer
Di dawiya axaftina xwe de, Temellî bal kişand ser bandora şerê li herêmê û krîza aborî ya li Tirkiyeyê. Temellî diyar kir ku polîtikayên Wezareta Aboriyê xîzanî û betaliyê kûrtir dikin û got: “Edaleta civakî li erdê maye. Çavkanî ji sermayedaran re tên veqetandin, lê gel birçî ye. Divê demildest bernameyeke nû ya aboriyê ku bersivê bide daxwazên civakê were pêşxistin.”
/Çavkanî: AW/
