🔴Di Navbera Îsraîl û Îranê de Şerê Dezgehên Enerjiyê: Supaya Pasdaran Bersiv Da
NÛPEL – Balafirên Îsraîlê li Tehran û Kerecê êrişî çend stasyon û bircên sereke yên elektrîkê kirin; her wiha li nêzîkî bajarê Tewrêzê jî komplekseke petrokîmyayê hate armanckirin.
Wezareta Enerjiyê ya Îranê ragihand ku di encama bombebaranan de elektrîka gelek navçeyên Tehran û Kerecê qut bûye, lê wan bi lez ew pirsgirêk çareser kiriye. Di beramber de, Supaya Pasdaran bersiva êrişên Îsraîlê da û êrişî dezgehên enerjî û pîşesaziyê yên li hundirê Îsraîlê kir.
Bombebarankirina Sektora Enerjî û Pîşesaziya Îranê
Şeva yekşemê, dezgehên elektrîkê û pîşesaziyê yên Îranê li parêzgehên Tehran û Elbûrzê (Kerec) hatin armanckirin. Derdora saet 21:00ê, li rojhilat, bakurê rojhilat û rojavayê Tehranê gelek cih hatin bombebarankirin ku di encamê de elektrîka hin taxên bakur û rojhilatê bajêr qut bû.
Her wiha, li bajarê Kerecê yê parêzgeha Elburzê jî çend cih hatin bombebarankirin. Piştî van êrişan, elektrîka taxên wekî Ezîmiye, Melasedra, Mêhrvîla, Taleqanî, Dêhqan Vîla û Gewherdeştê qut bû.
Alîkarê Wezîrê Enerjiyê û Birêvebirê Şirketa Dabeşkirina Elektrîkê ya Îranê, Mistefa Recebî Meşhedî, ji medyaya fermî re ragihand ku pirsgirêka qutbûna elektrîkê di demeke kurt de hatiye çareserkirin. Li gorî agahiyan, birceke elektrîkê li nêzîkî Kerecê û stasyoneke dabeşkirina elektrîkê li navçeya Duşan Tepê ya bakurê Tehranê hatine armanckirin.
Êrişa li ser Petrokîmyaya Tewrêzê
Şeva yekşemê li nêzîkî bajarê Tewrêzê, êrişeke asmanî birin ser kompleksa petrokîmyayê. Birêvebirê Giştî yê Kontrolkirina Krîzan ê Parêzgeha Azerbaycana Rojhilat, piştrast kir ku yekeyeke vê kompleksê hatiye bombebarankirin. Lê belê, wî nûçeyên derbarê belavbûna madeyên kîmyayî yên metirsîdar de red kirin.
Ji xeynî van deran, li Tehranê pênc cihên din li navçeyên 1, 4, 13, 15 û 21ê hatin bombebarankirin, lê hîn agahiyên zelal derbarê navên wan cihan de nehatine bidestxistin.
Berfirehbûna Êrişan li Seranserê Îranê
Êrişên li ser Tehranê roja yekşemê jî berdewam kirin. Li gorî medyaya Îranê, di navbera saet 07:30ê sibehê û nîvro de, ev cihên jêrîn hatin armanckirin:
Avahiya televizyona El-Erebî ya Qeterê.
Firoşgehek li taxa Efseriyê û çend avahî li taxên Şehrekî Rêya Hesinî, Têhranser, Zefer û Seadet Abadê.
Yekeyeke bazirganiyê li cadeya Benî Haşim û navendeke peywendiyan li navçeya 1ê.
Bilindahiyên Tûçalê, parkên Yas û Kewserê, û navenda firotina fêkî û sebzeyan li navçeya 15an.
Şaxeke Banka Mellî û kargeheke kartonan li başûrê Tehranê.
Ji xeynî Tehranê, bajarên wekî Şîraz, Reşt, Bûşehr, Yezd, Îsfehan, Şahînşehr, Qum û Şeftê jî bûn armanca bombebaranan. Li gundê Usmawendan ê ser bi bajarê Şeftê, di encama êrişa li ser pênc xaniyan de 6 kesan jiyana xwe ji dest da. Her wiha, li Zanîngeha Pîşesaziyê ya Îsfehanê laboratuwarek hat rûxandin û 4 karmend birîndar bûn.
Bersiva Îsraîl û Îranê
Artêşa Îsraîlê ragihand ku hêzên wan zêdetirî 140 carî êrişî “armancên ser bi rejîma Îranê” kirine.
Li aliyê din, Fermandarê Hêza Asmanî ya Supaya Pasdaran, Seyîd Mecîd Musewî, diyar kir ku wan di bersiva van êrişan de kompleksa pîşesaziyê ya Neot Hovav a li Bîr Sebeyê, komplekseke polayê û du kompleksên hilberîna alyûmînyûmê (elemyon) li hundirê Îsraîlê bombebarankirin. Her wiha, Îranê di 28ê Adarê de êrişî kargeha Alba ya li Behreynê kir, ku wekî mezintirîn kargeha alyûmînyûmê ya cîhanê tê naskirin.
/Çavkanî: Rûdaw/
