🔴Nûpel – Berpirsên pilebilind ên îdareya Serokê Amerîkayê Donald Trump ragihandin ku operasyonên leşkerî yên li dijî Îranê ber bi dawiyê ve diçin û pêşbînî dikin ku şer di nava çend hefteyan de bi dawî bibe. Li gorî daxuyaniyan, tevî bandorên neyînî yên demkurt li ser aboriya cîhanê, bi dawîhatina şer re dê bihayê enerjiyê dakeve û aramî vegere bazarên cîhanî.
Wright: “Bihayê petrolê dê dakeve”
Wezîrê Enerjiyê yê Amerîkayê Christopher Wright, derbarê geşedanên dawî yên li herêmê daxuyanî da medyaya welatê xwe. Wright destnîşan kir ku ev şer “pêvajoyek demkurt a bi êş” e, lê ji bo rêgirtina li ber bernameya nukleerî ya Îranê gava herî pêwîst e.
Wright got:
“Bi baweriya min dê ev şer di çend hefteyên bê de tekez bi dawî bibe. Piştî wê em dê bibînin ku dabînkirina petrolê zêde dibe û biha dadikevin.”
Tengava Hurmizê û Krîza Enerjiyê
Ji ber êrişên ku 28ê Sibatê dest pê kirin û bersivdayîna Tehranê ya bi girtina Tengava Hurmizê (ji 2yê Adarê ve), bihayê petrolê bi awayekî berbiçav zêde bûye. Bihayê bermîleke petrolê ku beriya krîzê 72 dolar bû, niha 100 dolarî derbas kiriye.
Tengava Hurmizê ji bo aboriya cîhanê xaleke krîtîk e; li gorî daneyên Saziya Zanyariyên Enerjiyê ya Amerîkayê (EIA), ji sedî 20ê petrola cîhanê di vê rêrewayê re derbas dibe.
Operasyon li pêşiya plankirinê ye
Birêvebirê Encumena Aboriya Niştimanî Kevin Hassett jî diyar kir ku operasyonên leşkerî ji texmînên wan zûtir bi pêş dikevin. Hassett anî ziman ku berê wan 4 heta 6 hefte ji bo operasyonê diyar kiribûn, lê niha pêşketin li pêşiya vê demê ne û bi dawîbûna şer re dê “geşbûneke mezin” di aboriya cîhanî de çêbibe.
Banga Trump û Hevpeymaniya Navdewletî
Li aliyê din, Balyozê Amerîkayê yê li Neteweyên Yekbûyî Mike Waltz ragihand ku ji bo parastina asayîşa deryayî ya li herêmê, danûstandinên wan bi welatên hevpeyman re berdewam dikin.
Ev daxuyanî piştî banga Serok Donald Trump hat ku tê de daxwaz ji welatên wekî Çîn, Fransa, Japonya, Koreya Başûr û Brîtanyayê kiribû ku ji bo vekirina Tengava Hurmizê û parastina keştiyan, hêzên xwe yên deryayî bişînin herêmê. Wezîr Wright jî piştrast kir ku hemû amûrên leşkerî yên Amerîkayê niha ji bo vekirina vê rêrewaya girîng di nav liv û tevgerê de ne.
/Çavkanî: Rûdaw/
