🔴AMED (Nûpel) – Zarokên Kreş û Mala Nihêrtinê ya Zarokistana Perperikê ku bi ser Şaredariya Peyasê ve ye, bi çalakiyeke rengîn û bi cil û bergên herêmî hatina biharê û Cejna Newrozê pîroz kirin.
Zarokên ku di bin banê Gerînendetiya Çand û Karên Civakî ya Şaredariya Peyasê de perwerdeya pirzimanî dibînin, bi boneya 21’ê Adarê Cejna Newrozê bernameyeke taybet li dar xistin. Di şahiyê de zarokan bi lixwekirina kincên kurdewarî, gotina stranan û gerandina govendê bal kişandin ser parastina çanda xwe.
Hevşaredar Dundar: “Zarok bi Çanda Xwe Mezin Dibin”
Şahiya ku li baxçê kreşê hat lidarxistin, bi beşdariya Hevşaredarê Peyasê Cengîz Dundar, alîkarên hevşaredaran û xebatkarên kreşê bi rê ve çû. Hevşaredar Dundar di dema pîrozbahiyê de axivî û girîngiya perwerdeya pirzimanî û çandî anî ziman.
Dundar di axaftina xwe de wiha got:
“Bi perwerdeya pirzimanî re em çand, huner û dab û nerîtên xwe bi zarokan didin nasîn. Pîrozbahiya Newrozê derfetê dide ku zarok di vî temenî de nasname û çanda xwe ji nêz ve binasin. Em Newroza van zarokên me yên delal pîroz dikin.”
Rengên Newrozê û Kêfxweşiya Zarokan
Di nav lîstik û çalakiyên cihêreng de, zarokan bi coşeke mezin hatina biharê pîroz kir. Şahî piştî nîşandanên hunerî û lîstikên gelêrî bi dawî bû. Ev çalakiya ku bi armanca veguhastina çandê ji bo nifşên nû hatibû amadekirin, ji aliyê malbatên zarokan ve jî bi dilxweşî hat pêşwazîkirin.
