🔴Nûpel – Li navçeya Qaimê ya li ser sînorê Iraq û Sûriyeyê, navendên operasyonên stratejîk û baregehên leşkerî yên Heşdî Şabî bûn armanca êrîşên asmanî.
Di êrîşan de 3 endamên Heşdî Şabî jiyana xwe ji dest dan û gelek kes jî birîndar bûn.
Li gorî daxuyaniya fermî ya Desteya Heşdî Şabî, roja Çarşemê, 18ê Adara 2026an, derdora saet 16:10an, du xalên leşkerî yên girîng li navçeya Qaimê bi giranî hatin bombebarankirin.
Baregeha Qasim Muslih rasterast hat hedefgirtin
Armanca herî baldar a êrîşê, baregeha Fermandarê Operasyonên Enbarê Qasim Muslih bû ku wek yek ji kesên herî bi bandor ên Heşdî Şabî li herêmê tê naskirin. Hat ragihandin ku hevdem avahiya Tabûra 2yemîn a ser bi Tûgaya 45an a Heşdî Şabî jî hatiye lêdan.
Qaymeqam êrîş piştrast kir
Qaymeqamê Qaimê Turkî el-Mehlawî ji Rûdawê re axivî û piştrast kir ku navenda operasyonên Heşdî Şabî ya li navçeyê hatiye bombebarankirin. Hat zanîn ku piştî êrîşê gelek ambûlans sewqî herêmê hatine kirin û zirareke mezin a madî gihîştiye baregehan.
Bîlanço: 3 mirî û gelek birîndar
Li gorî agahiyên destpêkê yên ku Heşda Şabî parve kirine, di encama bombebaranê de 3 endamên Heşdî Şabî li cihê bûyerê jiyana xwe ji dest dane. Personelên din ên birîndar rakirin nexweşxaneyên Qaim û herêmên derdorê; hat diyarkirin ku rewşa hinek ji wan giran e.
Navçeya Qaimê ya li ser xeta sînorê Sûriye-Iraqê, ji aliyê lojîstîk û stratejiya leşkerî ve wek yek ji xalên herî hesas ên herêmê tê naskirin.
/Çavkanî: Rûdaw/
