🔴NÛPEL – Êrişên bi dron û mûşekan ên li ser Herêma Kurdistanê, bi taybetî li ser bajarê Hewlêrê, di asteke metirsîdar de berdewam dikin. Di êrişa herî dawî ya vê sibehê de, pergalên parastinê karîbûn dronên êrişker beriya bigihîjin armancên xwe têk bişkînin.
Li gorî zanyariyên ku ji çavkaniyên herêmî û dîmenên Rûdawê hatine bidestxistin, dronek li nêzîkî komelgeha Sêbîranê ketiye xwarê. Herwiha parçeyên dronên teqandî li taxa Fermanberan a Hewlêrê li xanî û otomobîla welatiyekî ketine û bûne sedema ziyanên maddî.
Ji 28ê Sibata 2026an vir ve, piştî rageşiya leşkerî ya di navbera Îsraîl-Amerîka û Îranê de, Herêma Kurdistanê bûye hedefa serekî. Ji wê dîrokê heta îro, hejmara mûşek û dronên ku ber bi herêmê ve hatine avêtin 300î derbas kiriye.
Li gorî şopandinên pisporên leşkerî, sê navçeyên sereke wekî xalên destpêkirina êrişan tên nîşandan:
1. Beac û Hezer (Nînova): Ev navçe di bin kontrola Lîwaya 40î (Ketîbeyên Îmam Elî) û Lîwaya 44an (Ensar El-Merceiyê) de ne. Dûrahiya wan ji Hewlêrê navbera 51 heta 74 kîlometreyan e.
2. Dubiz (Kirkûk): Ev xala ku tenê 22 kîlometreyan ji Hewlêrê dûr e, wekî herêma herî metirsîdar tê dîtin. Li vir jî Lîwaya 40î ya Heşdî Şabiyê serdest e.
3. Xurmatû (Selahedîn): Ev navçe bi taybetî ji bo ewlehiya Silêmaniyê metirsiyeke mezin çêdike.
Pisporê leşkerî û Emîndarê Berê yê Wezareta Pêşmerge, Cebar Yaver, derbarê teknîka van êrişan de agahiyên girîng parve kirin. Yaver destnîşan kir ku ev dron kopiyên modelên Îranî ne û li hundirê Iraqê tên çêkirin.
• Modelên Dronan: Arêş, Şahid û Semed.
• Menzîl: Menzîla van dronan digihîje 100 kîlometreyan.
Ev êriş di demekê de ne ku zextên navdewletî û navxweyî yên ji bo parastina serweriya Herêma Kurdistanê zêde bûne, lê tevî pergala parastinê jî metirsiya li ser jiyana sivîlan berdewam dike.
/Çavkanî: Rûdaw/
